Një trafikant shqiptar i dënuar për drogë ka bërë një deklaratë tronditëse në gjyqin që po zhvillohet në Gjermani, duke akuzuar një prokuror të shtetit si informator të mafies së kokainës.
Sipas mediave gjermane, Besim M., 41 vjeç, që po vuan një dënim gjashtëvjeçar nga tetori 2024, dëshmoi para Gjykatës së Qarkut në Hanover se prokurori Yashar G., nga Prokuroria e Hannoverit, i ka dhënë informacion të klasifikuar grupit kriminal përmes pagesave mujore.
Sipas tij, ky prokuror i cili aktualisht ndodhet nën hetim për korrupsion – i jepte të dhëna për bastisje, vëzhgime dhe hetime të mundshme, ndërkohë që paraqitej si “mik” në takime të fshehta. Besim M. tregoi se për herë të parë u takua me të në vitin 2019 në një restorant grek, por më vonë mësoi identitetin e tij gjatë një shëtitjeje në liqenin Maschsee. Sipas dëshmisë, ai e paguante Yashar G. me 5000 euro në muaj.
Hetuesi kryesor i çështjes së një prej tentativave më të mëdha të trafikut të drogës në Gjermani – përpjekja për të kontrabanduar 16 ton kokainë nga porti i Hamburgut – ka rezultuar të ishte vetë Yashar G.
Për të ruajtur fshehtësinë, në komunikimet e koduara përmes aplikacionit kriminal “Sky ECC”, emri i prokurorit përmendej me pseudonimin “Cop”.
Hetimet ndaj grupit dhe vetë prokurorit po vijojnë, ndërsa rasti ka hapur debat të gjerë mbi integritetin e institucioneve të drejtësisë në Gjermani.
