Ish-deputeti i Partisë Demokratike, Ervin Salianji, ka folur për përvojën e tij pas qëndrimit rreth 9 muaj në burg, duke theksuar se është pritur mirë nga të dënuarit e tjerë.
Në një intervistë për emisionin “Opinion”, Salianji u shpreh se shumë prej personave që ndodhen në burg janë të akuzuar për krime të ndryshme, përfshirë edhe ata që në media janë përmendur si drejtues të grupeve kriminale.
Ai u shpreh se të dënuarit e pritën mirë, ndërsa shtoi se shumë prej tyre ndodhen në burg për akuza që ende nuk janë provuar.
Pjesë nga intervista:
Salianji: Të gjithë ata që ishin aty e kanë shkelur ligjin ose janë në pritje tu gjykuar për një krim të pretenduar. Kush është në atë institucion ka shkelur ligjin. Janë të gjitha llojet e veprave penale. Burgu i Fierit është burgu më i madh në Shqipëri për kapacitet që mban sot. Ka të dënuar të të gjithë profileve dhe veprave të kryera.
Pyetje: Pra nga njerëz të administratës deri te vrasës?
Salianji: Ka nga ata që ju nëpër studio i keni quajtur si krerët e grupeve kryesore kriminale.
Pyetje: Të lidhte puna me ta?
Salianji: Aty nuk ke punë, ke vetëm vuajtje. Padyshim ka edhe ambiente të përbashkëta që ndaje me ta. Në ato ambiente janë persona që nuk kanë mundësi të kryejnë vepra penale. Pritja ka qenë e mirë.
