Gazetari Genc Burimi ka komentuar veprimet e institucioneve të drejtësisë në lidhje me prishjet në Theth, duke akuzuar Inspektoratin e Lartë të Drejtësisë (ILD) për standard të dyfishtë.
Ai shtoi se kur kritikat vijnë nga opozita, nuk kanë peshë, ndërsa kur ato vijnë nga mazhoranca, shkaktojnë ndërhyrje direkte në sistemin e drejtësisë. Sipas tij, kjo përbën një presion të jashtëzakonshëm mbi drejtësinë nga ana e qeverisë, e cila kontrollon buxhetin dhe emërimet.
Gjithashtu, gazetari apeloi për ngritjen e një komisioni hetimor parlamentar, duke thënë se “për këtë shërben parlamenti.”
“Kur Berisha dhe opozita ankohen për Irena Gjokën, nuk lëviz asgjë, ILD nuk lëviz fare, kur Rama thotë që është skandal prokurorja, menjëherë ILD e ndjek. Kjo është një i nënës, një i njerkës.
Problemi është që një opozitë mund ta shajë drejtësinë se s’ka gjë në dorë, kur një qeveri shan drejtësinë, ajo ka në dorë buxhetin e drejtësisë, emërimet në drejtësi, pra i bën njëlloj presioni të jashtëzakonshëm. Nuk ka rast më të artë sot kjo opozitë të kërkojë një komision hetimor parlamentar, duke përfshirë edhe këtë shantazh të rëndë ndaj prokurores.
Të kuptojmë gjithçka, që nga bakshishet e paguara, se ata banorë ankohen, kanë paguar bakshishe, gjithçka të hetohet. Duhet një komision hetimor parlamentar, nëse Brukseli nuk e merr parasysh, është një turp, mos vazhdohet me negociatat.
Ne gazetarët nuk kemi asgjë në dorë, do themi është i poshtër, dihet që është i poshtër, e bëri gjithë këtë pas zgjedhjeve, por duhet avancuar, janë jetë njerëzish. Duhet një komision hetimor, gjithçka të pezullohet, të ndërhyjë Brukseli dhe opozita. Komision hetimor parlamentar, për këtë shërben parlamenti”, tha Burimi për SYRI TV.
Lexo edhe:
Manja “zbaton urdhërin” e Ramës, dërgon në ILD dhe KLP Prokuroren e Shkodrës, Elsa Gjelin
