Temperaturat e larta dhe thatësira kanë shtuar ndjeshëm qarkullimin e gjarpërinjve dhe insekteve helmuese në zonat rurale, duke rritur edhe rastet e pickimeve. Sipas mjekëve të urgjencës në QSUT, çdo javë raportohen të paktën tre raste të pickimeve nga gjarpërinjtë, kryesisht te pacientë që vijnë nga zonat rurale.
Një rast më i rëndë u regjistrua këtë javë me një 19-vjeçar nga Cërriku, i cili u dërgua në QSUT me komplikacione të rënda kardiake, pas një pickimi nga merimanga e zezë. Mjekët konfirmuan se gjendja e tij është stabilizuar falë trajtimit të menjëhershëm.
Drejtoresha e Operatorit të Kujdesit Shëndetësor, Jeta Deda, tha se janë marrë masa për të pajisur qendrat verore shëndetësore me medikamentet e nevojshme për të përballuar situatat e urgjencës.
Ekspertët theksojnë se në periudha të nxehta dhe të thata, si kjo verë, përqendrimi i helmit tek gjarpërinjtë dhe merimangat është më i lartë dhe për rrjedhojë edhe më i rrezikshëm për shëndetin e njeriut.
Ndryshe nga mushkonjat, për të cilat bëhet procesi i dezinsektimit, për gjarpërinjtë nuk lejohet përdorimi i kimikateve, për të mbrojtur faunën dhe ekosistemin./ Top Channel
