Presidenti amerikan Donald Trump ka mbledhur sot zyrtarët e lartë të administratës së tij për të paraqitur iniciativat më të fundit dhe për t’iu përgjigjur pyetjeve të gazetarëve. Një pjesë e mirë e diskutimit u përqendrua te lufta në Ukrainë dhe marrëdhëniet me Rusinë.
Trump u shpreh me tone të forta kundër presidentit rus Vladimir Putin, duke thënë se “nuk është i kënaqur me të” dhe e akuzoi për vrasjen e shumë personave, si në radhët e ushtrisë ruse, ashtu edhe të civilëve dhe ushtarëve ukrainas.
“Putini na thotë shumë budallallëqe,” deklaroi Trump në mënyrë karakteristike, ndërsa shtoi me ironi se “është gjithmonë i sjellshëm, por në fund nuk ka rëndësi”.
I pyetur nëse planifikon ndonjë veprim konkret kundër Putinit, Trump u përgjigj në mënyrë enigmatike: “Nuk do t’jua thoja”, duke lënë të hapur mundësinë për masa të mëtejshme. Ai shtoi se lufta mes Rusisë dhe Ukrainës ka rezultuar shumë më e përgjakshme dhe e ashpër sesa pritej në fillim.
Sa i përket sanksioneve të mëtejshme ndaj Rusisë, Trump deklaroi shkurt: “Po e shqyrtoj”. Gjatë fushatës së tij, ai ka theksuar shpesh se do ta përfundonte luftën në Ukrainë brenda 24 orëve, por ky pretendim vazhdon të mbetet pa prova konkrete.
