Ish-deputeti i Partisë Demokratike, Ervin Salianji, ka dalë sot nga burgu i Fierit. Pas lirimit, Salianji reagoi ashpër ndaj qeverisë, duke e cilësuar burgosjen e tij si një akt politik të orkestruar nga kryeministri Edi Rama. Ai akuzoi mazhorancën se synoi ta largonte nga beteja zgjedhore dhe ta ndëshkonte për denoncimet që ai kishte bërë ndaj pushtetit.
“Çdo ditë e imja në burg është një denoncim për regjimin e Ramës. Qytetarët do rezistojnë dhe do rrëzojnë një qeveri që është e kriminalizuar,” deklaroi Salianji para mediave, duke theksuar se nuk do të ndalet në përballjen e tij me atë që e quan një sistem autoritar dhe të kalbur.
Ervin Salianji, ish-deputeti i PD-së: Çdo ditë e imja në burg është denoncim për regjimin e Ramës. Qytetarët do rezistojnë dhe do rrëzojnë një qeveri, që është e kriminalizuar. Ditët e mia në burg tregojnë regjimin e kalbur ku jetojmë.
Beteja ime ndaj regjimit nuk është ndaluar asnjëherë. Regjimi më burgosi nga frika e humbjes, aq sa mund të quhen zgjedhje. Qeveria ka dobësuar më shumë demokracinë më shumë në vend. Burgosja ime ka qenë për arsye politike.
Ish-deputeti i Partisë Demokratike, Ervin Salianji, u dënua me 1 vit burg për denoncimin e Geron Xhafajt, vëllait të ish-ministrit të Brendshëm Fatmir Xhafaj. Dënim, që sipas Salianjit dhe PD-së ishte politik, u la në fuqi nga Gjykata e Apelit dhe më pas edhe nga Gjykata e Lartë.
Salianji vuajti mbi 10 muaj në burgun e Fierit, ku më 8 korrik 2025 u lirua me kusht, pasi kishte ezauruar 2/3 e dënimit. Vendimi u mor nga gjyqtari Noel Vezizi, pas vlerësimeve pozitive të Institucionit të Ekzekutimit të Vendimeve Penale dhe Shërbimit të Provës, si dhe dakordësisë së prokurorit Genci Mane.
Përveç dënimit me burg, Salianji është i penalizuar edhe me ndalim për të ushtruar funksione publike për një periudhë 5-vjeçare. Ai ka paralajmëruar se do ta ndjekë çështjen në Gjykatën e Strasburgut, duke e cilësuar veten një të dënuar politik.
