Një 31-vjeçar nga Kosova është arrestuar në Sarandë pasi u kap në flagrancë me armë zjarri në automjetin që drejtonte. Operacioni u zhvillua nga Komisariati i Policisë Sarandë dhe u kodua “Impact”, në kuadër të masave për sigurinë gjatë sezonit turistik.
I arrestuari është shtetasi Sh. M., banues në Gjilan, Kosovë. Gjatë kontrollit në mjetin “Range Rover” që ai drejtonte në zonën e Ksamilit, Policia gjeti në çantën e dorës një pistoletë tip “Beretta” me një krehër me fishekë.
Arma e zjarrit, municioni dhe automjeti u sekuestruan në cilësinë e provës materiale. Materialet procedurale i janë referuar Prokurorisë pranë Gjykatës së Sarandës, ku ndaj të dyshuarit do të vijojnë hetimet për veprën penale të “armëmbajtjes pa leje”.
