Gazetari Bledian Koka komentoi lirimin e Ervin Salianjit dhe e ka krahasuar me arrestimin e Erion Veliajt.
Koka e cilësoi burgosjen e Salianjit si një padrejtësi të rëndë të sistemit të drejtësisë, ndërsa për Veliajn u shpreh se ai është mishërimi i korrupsionit në bashkinë e Tiranës, një figurë që ka kontribuar në shkatërrimin ekonomik të kryeqytetit.
“Jemi duke folur për dy ngjarje që kanë ndodhur në të njëjtën ditë, por janë dy ngjarje që s’kanë asnjë lloj lidhje me njëra-tjetrën dhe nuk takohen askund. Nga njëra anë po flasim për një njeri që ka bërë burg në mënyrë të padrejtë jo vetëm për shkak të hetimit, por kësaj here edhe për shkak të gjykimit. Është një çështje e cila si në hetim ashtu edhe në gjykim vendosi standarde të tmerrshme të funksionimit të përdorimit të drejtësisë. Hetimi u bë pis, sepse u përfshinë kaq shumë aktorë të dirigjuar, u shpikën dëshmitarë të rremë, dolën përgjime sesi ish-drejtues të lartë të policisë komunikonin dhe mbanin me para dëshmitarin e rremë që do duhej të fajësonte dhe të bënte pis denoncimin e zotit Salianji. Më pas një vendim gjyqi dhe një gjykim i cili vendosi një standard shumë të rrezikshëm, që shpresoj shumë të shbëhet në muajt ose në vitet në vazhdim me rekursin që do bëjë Salianji. Nga ana tjetër kemi një njeri i cili është në burg, në radhë të parë si një ekzistencë e gjallë e korrupsionit, sidomos në bashkinë e Tiranës. Ishte bashkëfajtor dhe bashkëautor i shumë prej dramave të mëdha që i kanë ndodhur ekonomikisht kryeqytetit të vendit. Pra, këto janë dy gjëra të ndryshme.” – tha Koka për SYRI TV.
