Gjatë ditës së sotme, në vend janë regjistruar gjithsej 15 vatra zjarri. Prej tyre, 11 janë shuar plotësisht, ndërsa 4 vijojnë të jenë ende aktive.
Zjarret e shuara janë shënuar në zonat: Mnelë e Madhe (Vau i Dejës), Karahaxhë (Finiq), lagjja Nr. 6 (Kavajë), Stajkë (Bushat), Porodinë (Korçë), Gur i Bardhë (Dimal), Radësh (Skrapar), Togëz (Librazhd), Mbrostar (Fier), Katundi i Ri (Kurbin) dhe Mamëz (Kukës).
Aktualisht, aktive mbeten këto vatra:
Në Vlorë, në zonën malore mes fshatrave Tragjas dhe Dukat,. Zjarri është në sipërfaqe me shkurre dhe nuk rrezikon banesat.
Në Poliçan, në fshatin Zgërbonjë, ku edhe pse vatra mbetet aktive, nuk përbën rrezik për zona të banuara.
Në Dibër, në zonën “Fusha e Peladhisë” në Fushë-Bulqizë. Flakët janë përhapur në tre vatra të veçuara dhe deri më tani nuk ka rrezik për përhapje të mëtejshme.
Po në Dibër, në Parkun Kombëtar të Lurës, në zonën “Liqeni i Luleve”, zjarri ka marrë përmasa më të mëdha për shkak të erës, duke rrezikuar një sipërfaqe të madhe pyjore me pisha.
