Prokuroria pranë Gjykatës së Shkallës së Parë të Juridiksionit të Përgjithshëm Shkodër ka reaguar pas deklaratave të kryeministrit Edi Rama, i cili akuzoi prokuroren Elsa Gjeli për mosveprim lidhur me ndërtimin e një kompleksi pa leje në zonën e mbrojtur të Thethit.
Në një reagim zyrtar, Prokuroria sqaron se vendimi për mosfillimin e procedimit penal, i marrë më 30 maj 2025 nga prokurorja Gjeli, është bazuar në nenin 290, pika ç të Kodit të Procedurës Penale, i cili parashikon se hetimi penal nuk mund të nisë nëse fakti i referuar nuk përbën vepër penale ose kur fakti “nuk ekziston”.
Sipas Prokurorisë, strukturat e konstatuara nga Policia në Theth kanë qenë kontenierë të përkohshëm pa themele, të vendosur mbi pllaka guri, dhe nuk përmbushin kriteret ligjore për t’u cilësuar si objekte ndërtimi sipas ligjit nr. 107/2014 “Për planifikimin dhe zhvillimin e territorit”.
Prokuroria thekson se vendimi i marrë është akt ligjor dhe jo vullnet personal, i mbështetur në analizën juridike të fakteve dhe provave të administruara. “Prokurori, si organ kushtetues i pavarur, ka detyrimin të veprojë vetëm në përputhje me ligjin dhe të mos ndikohet nga faktorë të jashtëm, përfshirë edhe deklaratat politike,” thuhet në reagim.
Institucioni shton se çdo përpjekje për të ndikuar në vendimmarrjen e prokurorit, qoftë përmes deklaratave publike apo presionit politik, cënon ndarjen e pushteteve dhe dëmton besimin e qytetarëve tek drejtësia.
Deklarata e kryeministrit
Më herët gjatë ditës, kryeministri Edi Rama, përmes një postimi në rrjetet sociale, reagoi ashpër ndaj prokurores Elsa Gjeli, duke e akuzuar se ka refuzuar të hetojë një ndërtim të paligjshëm në zemër të Parkut Kombëtar të Thethit.
Sipas Ramës, bëhet fjalë për një “krim të shumëfishtë mjedisor”, që është lënë pa ndëshkim, dhe që sipas tij, ka sjellë kosto shtesë për shtetin dhe taksapaguesit, për shkak të ndërhyrjes së IKMT-së dhe institucioneve të tjera për prishjen e strukturave.
Kryeministri pyeti publikisht “çfarë borxhi kanë qytetarët ndaj prokurores Gjeli” dhe vuri në dyshim vendimin për mosveprim, duke e cilësuar si një refuzim për të zbatuar ligjin.
Megjithatë, sipas Prokurorisë, mungesa e elementëve të veprës penale dhe analizimi i legjislacionit në fuqi nuk kanë lënë hapësirë për ndjekje penale, duke bërë që çështja të mbyllet me vendimin për mosfillim të procedimit.
