Ministri i Brendshëm, Ervin Hoxha, së bashku me drejtuesit e IMT-së, Policisë Bashkiake dhe Policisë së Shtetit ka dalë këtë të diel në terren, në disa prej zonave më të populluara të Tiranës, në kuadër të një aksioni të koordinuar për lirimin e hapësirave publike të zëna në mënyrë të paligjshme nga subjekte private.
Ky aksion vjen vetëm një ditë pas ultimatumit të dhënë nga kryeministri Edi Rama, i cili kërkoi që bizneset të lirojnë vullnetarisht trotuaret, sheshet dhe sipërfaqet publike.
Ministri Hoxha u ka bërë thirrje bizneseve që të lirojnë hapësirat e zëna sa më shpejt dhe vullnetarisht, për të shmangur ndërhyrjen me forcë nga autoritetet.
“Asnjë subjekt nuk ka të drejtë të pushtojë hapësira në kurriz të komunitetit. Strukturat do të vijojnë me vendosmëri në zbatimin e ligjit dhe mbrojtjen e interesit publik. Apeli im shkon për çdo subjekt në shkelje, që të lirojë shpejt e vullnetarisht hapësirat e zëna, duke kontribuar për një qytet më të pastër, më të sigurt dhe të aksesueshëm nga të gjithë”, tha ministri Hoxha.
Sot ministri i Brendshëm ishte në zonat e “Zogut të Parë”, “Pazarit të Ri”, pjesën pas Muzeut Kombëtar dhe kompleksin pranë zonës së “21 Dhjetorit”.
