Policia franceze ka nisur të përdorë një taktikë të re për të ndaluar varkat e emigrantëve që tentojnë të kalojnë Kanalin e La Manshit drejt Mbretërisë së Bashkuar.
Metoda përfshin përdorimin e jet-skive në mënyrë sekrete për të vendosur rrjeta që bllokojnë helikën e gomoneve, duke i ndaluar ato në ujëra të cekëta. Gjatë një prove të zhvilluar të premten, policët hynë edhe në ujë për të shpuar gomonen me thikë, raporton The Sun.
Këto veprime vijnë para vizitës shtetërore të presidentit francez Emmanuel Macron në Britani, ku pritet të prezantohen strategji të reja për forcimin e kontrollit në kufi. Masat pritet të hyjnë në fuqi brenda pak javësh dhe të bëhen pjesë e rutinës së oficerëve francezë.
Ministrja britanike e Brendshme, Yvette Cooper, tha se bashkëpunimi mes dy vendeve për parandalimin e kalimeve ilegale është forcuar, duke shtuar se nuk do të ndalen për të mbrojtur sigurinë e kufijve britanikë.
Ndërkohë, numri i emigrantëve që kanë mbërritur këtë vit në Mbretërinë e Bashkuar përmes varkave të vogla ka kaluar 20,000, pavarësisht fondeve prej 500 milionë paundësh që Britania ka dhënë Francës për frenimin e kalimeve.
Një marrëveshje “një për një” mes Britanisë dhe Francës për kthimin e emigrantëve është ende në diskutim, ku emigrantët që kalojnë Kanalin mund të rikthehen në Francë dhe të shkëmbehen me azilkërkues me lidhje familjare në Britani.
