Edi Rama mbërriti paraditen e kësaj të premte në selinë e PS për të zhvilluar një takim me deputetët socialistë të Tiranës.
Ky takim është vazhdim i atij të djeshmit me drejtorët e Bashkisë Tiranë dhe deputeten e zgjedhur më 11 Maj. Burime të Top Channel nga kjo mbledhje tregojnë se Rama ka prekur edhe mundësinë e zgjedhjeve të parakohshme në bashkinë e Tiranës.
“Nuk i dihet si do të shkojë kjo punë”, citohet të ketë thënë Rama duke qenë në dilemë për shkarkimin e mundshëm të Veliajt.
Sipas të njëjtave burime mësohet se Rama u ka kërkuar socialistëve që të mos bëhet asnjë bisedë në studiot televizive për zgjedhjet e mundshme për Bashkinë e Tiranës, në një kohë kur kryebashkiaku i arrestuar i Tiranës, Erion Veliaj ndodhet në qeli.
Kjo pikëpyetje e ngritur nga Rama për mbajtjen ose jo të zgjedhjeve në Bashkinë Tiranë lidhjet edhe me një zhvillim të pritshëm se çfarë do të vendosë më 8 korrik Gjykata e Lartë për Apelin e kërkuar nga Erion Veliaj.
