Banorët e fshatit Rreth -Kale në Peshkopi prej 30 vjetësh vuajnë problemin e tensionit të ulët në banesat e tyre. Për këtë shkak ditën e kanë kthyer natë e natën ditë, pasi të gjitha punët e shtëpisë i bëjnë natën kur tensioni rritet.
Banorët ankohen se edhe pse kanë blerë stabilizator problemi i tyre mbetet sepse aparatet elektro shtëpiake nuk punojnë dhe u digjen. Është ndërtuar dhe një kabinë elektrike ku kanë vendosur një transformator para një viti e gjysmë, por problemi ka mbetur po i njëjtë. Njerëzit ngrihen natën kur vjen rryma e lartë që të bëjnë ndonjë punë që të mbushin ujë apo punë të tjera. Banorët tregojnë për Fiksin se voltazhi shkon nga 80 deri në 300 volt dhe telat elektrike janë të viteve ’70. Në kohë të keqe banorët mbeten pa elektricitet.
Një tjetër banor ankohet se edhe pse ka mbi një vit e gjysmë që ka montuar një kondicioner ai gjithsej mund të ketë bërë vetëm 10 orë punë. “Kondicioneri jo e jo, por edhe frigoriferi nuk punon me këtë energji dhe kam marrë dy stabilizator” shprehet njëri prej banorëve.
Të pyetur nëse kanë ndonjë orë të caktuar që rryma vjen normal banorët shprehen se vetëm në orën 05:00 të mëngjesit dhe njoftojnë njëri tjetrin me telefon. Me rrymën që kanë duhet të vënë vetëm një elektroshtëpiake në punë, nëse ndizen dy shuhet gjithçka. Lagjja ka aktualisht një transformator të ndërruar rishtazi prej dy muajsh, por kjo gjë nuk e ka rregulluar situatën.
Për këtë problematikë të fshatit Rreth-Kale Fiksi u interesua eshe në Drejtorinë e Përgjithshme të OSHEE-së. Ardian Kala drejtor për median tha se pas sinjalizimit të emisionit kishin marrë informacionin përkatës. ” Si ky fshat në atë zonë ka disa fshatra të tjerë dhe problematika qëndron tek shtrirja e madhe e tyre dhe se janë larg zonave, ku janë nënstacionet dhe rrjeti elektrik” shpjegon Z. Kala. Gjithashtu pohon se menjëherë sapo kanë marr dijeni nga Fiksi në fshat ka shkuar një grup pune për të parë situatën dhe të gjendej një zgjidhje imediate, jo afatgjatë.
“Aty duhet një ndërhyrje që tek kabina, infrastruktura e shtyllave e deri tek kabuj të sigurisë ABC. Këta kabuj i rezistojnë edhe kushteve të motit. Por zona komplet do një investim të mirëfilltë dhe me buxhetin e 2025 ky fshat dhe disa të tjerë do kenë zgjidhje përfundimtare me furnizimin e rregullt me energji elektrike.” përfundon drejtori për mediat i OSHEE-së./ Top Channel
