Presidenti amerikan Donald Trump ka kërkuar që drejtuesi i Rezervës Federale (Federal Reserve), Jerome Powell, të japë dorëheqjen menjëherë, duke e intensifikuar sulmin ndaj tij.
“‘Shumë vonë’ duhet të japë dorëheqjen menjëherë!!!”, shkroi Trump në platformën e tij Truth Social, duke iu referuar me ironi zotit Powell, raporton BBC.
Postimi i tij përfshinte gjithashtu një artikull që raporton se një rregullator federal i strehimit në SHBA ka kërkuar hetim ndaj Powell mbi dëshminë e tij për rinovimet në selinë e Bankës Qendrore në Uashington.
Trump e emëroi Powell-in si kryetar të Fed-it gjatë mandatit të tij të parë presidencial. Që atëherë, ai ka kritikuar vazhdimisht kreun e Bankës Qendrore për mosuljen e normave të interesit, megjithëse mbetet e paqartë nëse presidenti ka kompetencë ligjore për ta shkarkuar atë.
Pavarësisht kritikave të vazhdueshme, më herët gjatë këtij viti Trump kishte deklaruar se nuk kishte “asnjë synim për ta shkarkuar” Powell-in.
Trump i kërkon Rezervës Federale të ulë normat e interesit për të nxitur rritjen ekonomike.
Nga ana tjetër, Powell deklaroi të martën se Banka Qendrore do të kishte ulur tashmë normat, po të mos kishte qenë për ndikimin e politikave tarifore të vendosura nga vetë administrata Trump.
I pyetur gjatë një takimi të bankierëve qendrorë në Portugali nëse normat e interesit do të ishin ulur këtë vit, nëse administrata amerikane nuk do të kishte njoftuar për rritje të fortë tarifash ndaj vendeve të ndryshme, Powell u përgjigj: “Mendoj se kjo është e saktë.”
Rezerva Federale nuk pranoi të komentonte mbi deklaratat e Trump kur u kontaktua nga BBC.
Përpara rikthimit të Trump në pushtet në fillim të këtij viti, Powell kishte deklaruar se nuk do të japë dorëheqjen edhe nëse presidenti ia kërkon dhe se “kjo nuk lejohet nga ligji”.
Anëtarët e bordeve të agjencive të pavarura federale, siç është edhe Rezerva Federale, mund të shkarkohen përpara përfundimit të mandatit vetëm “për shkak të justifikuar”, sipas një vendimi historik të Gjykatës së Lartë të SHBA-së në vitin 1935.
Megjithatë, Trump ka sfiduar shpesh normat tradicionale politike, duke përfshirë edhe shkarkimin e disa rregullatorëve të pavarur, veprime që janë kontestuar në gjykatë.
Të mërkurën, drejtori i Agjencisë Federale për Financimin e Strehimit, Bill Pulte — i cili më parë ka qenë kritik i ashpër i Powell — kërkoi hetim ndaj tij.
“Po kërkoj nga Kongresi të hetojë kryetarin Jerome Powell, anshmërinë e tij politike dhe dëshminë e rreme në Senat, e cila përbën arsye të mjaftueshme për shkarkim ‘për shkak të justifikuar’,” shkroi Pulte në platformën X (ish-Twitter).
Javën e kaluar, Powell i kishte thënë Senatit se raportet për kosto të larta dhe veçori luksoze në zyrat e Fed ishin “të pasakta dhe të shtrembëruara në shumë, shumë aspekte.”
