Vijon prej më shumë se 24 orësh zjarri në fushën e grumbullimit të mbetjeve, pranë inceneratorit të Elbasanit, i cili nisi prej rreth orës 17:00 të pasdites së djeshme.
Dyshohet se kemi të bëjmë me zjarr-vënie të qëllimshme, ku qëllimi është djegja e maleve me mbetje për shkak se inceneratori, për të cilin janë harxhuar milioa euro, është jofunksional.
Elbasani prej më shumë se 24 orësh është përfshirë nga shtëllunga të zeza tymi, të cilat mund të kthehen në një rrezik për shëndetin e banorëve, nga djegja e mbetjeve të ndryshme urbane dhe industriale.
Kjo është një situatë e përvitshme, për të cilën Prokuroria e Elbasanit ka regjistruar një procedim penal që në vitin 2023 dhe hetimet janë ende në vazhdim, por deri tani asnjë prej përgjegjësve nuk është vendosur para drejtësisë.
Gjatë ditës së sotme, është bërë një virale edhe një deklaratë e Edi Ramës, e 25 Gushtit të vitit 2023, kur ai mbronte inceneratorët dhe deklaronte se u kishte hequr renë e zezë helmuese banorëve të Elbasanit nga koka.
“Pra është një investim i bërë, është pronë e Bashkisë Elbasan. Gjatë gjithë periudhës është ndërtuar impianti dhe njëkohësisht iu është hequr qytetarëve nga koka reja e zezë e helmit me të cilën jetonin të moshuarit, fëmijët dhe gjithë familjarët që banonin në Elbasan.” – ka deklaruar Rama, siç mund ta dëgjoni dhe nël videon e mëposhtme.
