Ditën e sotme do të mbahet seanca e radhës plenare në Kuvend, e cila pritet të nisë në orën 10:00.
Në rend të ditës do të jenë një sërë projektligjesh, mes të cilëve ndryshimet në ligjin e sportit, projektligji për ratifikimin e marrëveshjes së huas ndërmjet Shqipërisë dhe BERZH, si dhe ndryshimet për strukturën dhe klasifikimin e pagave të personelit pranë KQZ.
Projektligji i huasëpër marrjen e një hauje nga Banka Ndërkombëtare për Rindërtimin dhe Zhvillimin parashikon një hua shtesë nga BERZH me vlerë 76.9 milionë euro në mbështetje të digjitalizimit e shërbimeve në 61 bashki të vendit, që do të paguhen për vite me radhë nga taksa-paguesit shqiptarë
Që pas zgjedhjeve të 11 Majit, fokusi i opozitës në Kuvend ka qenë denoncimi i farsës elektorale të 11 Majit, e cila ka sjellë përplasje të forta me mazhorancën. E njëjta situatë pritet të jetë edhe në seancën e sotme në Kuvend.
Kujtojmë se parlamenti aktual i mbyll punimet në fund të javës së tretë të korrikut, ndërsa në shtator do të konstituohet parlamenti i ri, ku ligjvënësit aktualë do të duhet të “lirojnë” vendin për deputetët e rinj të dalë nga zgjedhjet e 11 Majit.
II. Rendi i ditës i seancës plenare është si më poshtë:
1. Miratimi i procesverbalit të seancës plenare të datës 16.6.2025.
2. Njoftime.
3. Projektligji “Për përpunimin e informacionit të udhëtimit në Republikën e Shqipërisë”.
4. Projektligji “Për kontrollin e kufirit shtetëror”.
5. Projektligji “Për shëndetin e bimëve”.
6. Projektligji “Për shëndetin e kafshëve”.
7. Projektligji “Për disa shtesa dhe ndryshime në ligjin nr. 79/2017 “Për sportin”, i ndryshuar.
8. Projektligji “Për disa shtesa dhe ndryshime në ligjin nr. 79/2021, “Për të huajt”.
9. Projektligji “Për Zyrën e Rikuperimit të Aseteve”.
10. Projektligji “Për ratifikimin e marrëveshjes së huas ndërmjet Republikës së Shqipërisë dhe Bankës Ndërkombëtare për Rindërtimin dhe Zhvillimin për financimin shtesë për “Veprimin e ofrimit të shërbimeve të përqendruara dhe gjithëpërfshirëse të përdoruesit”.
11. Projektligji “Për prodhimin, transportin, tregtimin dhe përdorimin e biokarburanteve dhe të lëndëve të tjera djegëse, të rinovueshme për transport”.
12. Projektvendimi “Për disa ndryshime në vendimin e Kuvendit nr. 67/2020 “Për miratimin e strukturës, organikës dhe klasifikimit të pagave të personelit me kohë të plotë pune të Komisionit Qendror të Zgjedhjeve”, të ndryshuar”.
13. Diskutime për çështje jashtë rendit të ditës.
