Gjykata e Posaçme e Apelit ka ndryshuar vendimin e Shkallës së Parë për ish-gjyqtarin e Gjykatës së Lartë, Guxim Zenelaj.
Ai ishte dënuar nga GJKKO me 6 muaj burgim të konvertuar në 1 vit shërbim prove, duke u shpallur fajtor për veprën penale “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Por ky dënim është ndryshuar nga Apeli, i cili e ka zëvendësuar dënimin me burg me 100 orë pune në shërbim publik. Vendimi është marrë nga trupa gjykuese e përbërë nga gjyqtarët Igerta Hysi (kryesuese), Tereza Merkaj (anëtare) dhe Iliriana Olldashi (anëtare).
Guxim Zenelaj u largua nga sistemi gjyqësor në korrik të vitit 2017, së bashku me anëtarët e tjerë Arjana Fullani, Andi Çeliku, Aleksandër Muskaj dhe Evelina Qirjako, të cilët njoftuan përfundimin e mandatit të tyre. Në vijim ata refuzuan t’i nënshtrohen procesit të rivlerësimit me pretendimin se nuk e kishin më statusin e magjistratit. Po ashtu refuzuan pozicionet në Apel. Bazuar mbi këtë refuzim, KPK vendosi se secili prej tyre kishte bërë dorëheqje dhe bazuar në ligjin për rivlerësimin kalimtar, caktoi masën që u ndalon rikthimin në sistemin e drejtësisë për 15 vjet.
Hetimet për të nisën pas kallëzimit të bërë nga një avokat për disa gjyqtarë të Gjykatës së Lartë dhe asaj Kushtetuese.
Në tetor të vitit 2023, Gjykata e Posaçme pranoi kërkesën e SPAK për konfiskimin e pasurive të Zenelajt, konkretisht të një ngastre toke me sipërfaqe 1000 m2 në Porto Palermo, Himarë dhe gjashtë pasuri të paluajtshme në Ishull-Shëngjin të Lezhës, konkretisht dy bodrume me sipërfaqe 16 m2 dhe 15 m2; njësi me sipërfaqe 218.06 m2, dhe tre apartamente me sipërfaqe 60.36 m2, 67.35 m2 dhe 51.35 m2.
Si burim për krijimin e pasurive të paluajtshme të mësipërme, gjyqtari në deklrataën e pasurisë së vitit 2016 referoi një kontratë me një kompani të caktuar, por nuk dha të dhëna se sa ishte vlera e kontratës si dhe për burimin e parave që mbulojnë vlerën e kontratës.
