Një punonjës i Operatorit të Shpërbimit të Shpërndarjes (OSSH) është arrestuar në Vlorë, pasi u kap në flagrancë duke marrë para në këmbim të favorizimit të një subjekti privat.
Policia bëri të ditur se është arrestuar shtetasi M. S., 35 vjeç, me detyrë shef ekipi për lexuesit e matësave në OSSH Vlorë. Ai dyshohet se ka marrë 100 euro për të ndërhyrë në aparatin matës të energjisë elektrike, në mënyrë që subjekti të paguante më pak.
Së bashku me të është arrestuar edhe shtetasi L. H., 42 vjeç, i cili ndodhej në masën e sigurisë “arrest në shtëpi” për një çështje tjetër penale, por u kap në vendin e ngjarjes duke shoqëruar punonjësin e OSSH-së.
‘Si rezultat i operacionit u arrestua për veprat penale “Shpërdorimi i detyrës” dhe “Korrupsioni pasiv i personave që ushtrojnë funksione publike”, shtetasi: M. S., 35 vjeç, me detyrë shef ekipi për lexuesit e matësave të energjisë elektrike, pranë OSSH Vlorë. Ky shtetas u kap në flagrancë duke marrë 100 euro nga një subjekt privat, me qëllim favorizimin për pagesën e energjisë elektrike, nëpërmjet ndërhyrjes në aparatin matës.
Gjatë operacionit u arrestua në flagrancë edhe shtetasi L. H., 42 vjeç, për veprën penale “Largimi i të burgosurit nga vendi i qëndrimit”, pasi u konstatua së bashku me shtetasin M. S., duke thyer masën e sigurisë “Arrest në shtëpi”, për veprën penale “Prodhimi dhe shitja e narkotikëve”.
Në kuadër të këtij operacioni, në cilësinë e provës materiale u sekuestruan 100 euro, 2 celularë dhe 1 automjet. Nën drejtimin e Prokurorisë, vijon puna për dokumentimin e rasteve të tjera të mundshme të kësaj veprimtarie kriminale dhe për identifikimin e shtetasve të tjerë të përfshirë‘, njoftoi policia.
