Një i burgosur ka ndërruar jetë në burgun e Lezhës. Autoritetet e burgjeve raportojnë se viktima është shtetasi Allush Hysa, i dënuar për plagosje të rëndë.
Bëhet me dije se Allush Hysa vuante nga epilepsia, çrregullim i sjelljes dhe prapambetje mendore dhe se prej 27 nëntorit të vitit 2021 vuante masën mjekësore “mjekim i detyruar”. I burgosuri është gjetur pa shenja jete rreth orës 07:00.
NJOFTIMI:
Në Institucionin e Ekzekutimit të Vendimeve Penale Lezhë, mëngjesin e sotëm, më datë 25.06.2025, rreth orës 07:00, është konstatuar pa puls i dënuari Allush Hysa, i datëlindjes 12.09.1989.
I dënuari ndodhej në dhomën nr. 3, kati i parë, godina nr. 5 dhe vuante masën mjekësore “mjekim i detyruar”, që nga data 27.11.2021, në zbatim të vendimit gjyqësor. Ai ishte i diagnostikuar me epilepsi, çrregullim të sjelljes dhe prapambetje mendore.
Referuar dosjes, Hysa ishte arrestuar më 23.01.2014 për veprën penale të “Plagosjes së rëndë”.
Menjëherë pas konstatimit të mungesës së shenjave jetësore, janë njoftuar SHKBSB, Prokuroria e Rrethit, komisariati i Policisë dhe familjarët.
Drejtoria e Përgjithshme e Burgjeve i shpreh ngushëllime familjes Hysa.
