Pas denoncimit publik dhe nisjes së një procedimi penal për ndërtim pa leje në një pronë publike në zonën e “Ujit të Ftohtë”, ndërtuesi Moisi Lazaj ka kaluar në një plan të ri: tjetërsimin e pronës nëpërmjet një skeme të modifikuar, që përfshin votimin e Këshillit Bashkiak dhe përfshirjen direkte të kryetarit të Bashkisë së Vlorës, Ermal Dredha.
Sipas burimeve dhe dokumenteve zyrtare, qëllimi është që prona t’i kalohet fillimisht Bashkisë së Vlorës dhe më pas, në një mbledhje tjetër, t’i transferohet firmës “Lazaj 2002”.
Strategjia e re është një përpjekje për të “faturuar burgun” te këshilltarët bashkiakë, ndërsa vetë kryetari i bashkisë dyshohet se do të përfitojë disa apartamente si pjesë e marrëveshjes me ndërtuesin.
Denoncimet zyrtare: Prona në proces gjyqësor, ndërtim pa leje, manipulim dokumentesh
Pas dështimit për t’a kaluar në dy tentativa të mëparshme në Këshillin Bashkiak, ku këshilltarët refuzuan të miratojnë tjetërsimin e pronës, Mojsi Lazaj ka ndryshuar taktikë.
Një shkresë zyrtare me nr. protokolli 10062 dhe 10063, depozituar në Bashkinë e Vlorës, vë në dijeni zyrtare institucionet se prona ndodhet në proces gjyqësor aktiv dhe se ndaj ndërtuesit ka procedim penal për ndërtim pa leje dhe falsifikim dokumentesh. Në të njëjtën shkresë përmendet edhe tentativa për tjetërsim të paligjshëm të pronës përmes një skeme të miratuar politikisht nga brenda bashkisë.
Megjithatë, ndërtuesi ka vijuar me mbulimin e betonit të hedhur ilegalisht me dhe, ndërsa ka vendosur një rrethim provizor në terren për të fshehur veprën penale. Pavarësisht konstatimeve nga IKMT dhe kallëzimit penal të depozituar, tentativa për të miratuar kalimin e pronës në mbledhjen e nesërme të Këshillit Bashkiak vijon me mbështetje nga brenda institucionit.
Skema: Nga Bashkia te Mojsiu – i njëjti mekanizëm i ndaluar më herët me Shtëpinë e Fëmijës
Skema që po tentohet është e njëjtë me atë që u përpoq të zbatohej më herët për Shtëpinë e Fëmijës në Vlorë, ku u ndërhynë institucionet qëndrore për të ndaluar abuzimin. Dredha këtë herë po del kundër institucioneve publike dhe vet qeverisë.
Tashmë, gjithçka është e strukturuar: Prona i kalon Bashkisë me justifikimin “interes publik”. Në një mbledhje tjetër, Bashkia e transferon tek “Lazaj 2002”.
Sipas burimeve, kjo është një marrëveshje e mirëkuptuar mes kryetarit të bashkisë, Ermal Dredha, dhe ndërtuesit Lazaj, ku kryetari përfiton në këmbim të mbështetjes institucionale dhe heshtjes ndaj zaptimit.
Çfarë rrezikojnë këshilltarët që votojnë për t’i falur pronën Mojsi Lazajt?
Nëse Këshilli Bashkiak voton për t’i kaluar një pronë publike një ndërtuesi të hetuar penalisht, në kundërshtim me statusin juridik të pronës (në proces gjyqësor), këshilltarët që mbështesin vendimin përballen me një sërë akuzash penale, si më poshtë:
- Shpërdorim detyre – Neni 248 i Kodit Penal
Dënimi: deri në 7 vite burg - Falsifikim dhe përdorim i dokumenteve zyrtare – Nenet 186 & 189
Dënimi: deri në 5 vite burg - Korrupsion pasiv i zyrtarëve publikë – Neni 259
Dënimi: 2 deri në 8 vite burg + ndalim ushtrimi funksioni publik - Ndihmë në ndërtim të paligjshëm dhe legalizim të pasurisë së vjedhur – Nenet 199/a dhe 287
Dënimi: deri në 5 vite burg - Pengim i drejtësisë – Neni 301
Dënimi: 6 muaj deri në 5 vite burg
Tashmë që këshilltarët janë vënë zyrtarisht në dijeni se prona është në proces gjyqësor dhe objekti i një hetimi penal, çdo votë nuk është më e padijshme, por e qëllimshme dhe me pasoja të drejtpërdrejta penale.
Përgjegjësia për këtë skemë korruptive nuk është më vetëm mbi ndërtuesin Lazaj. Përfshirja e kryetarit të bashkisë, Ermal Dredha, dhe këmbëngulja për ta futur pikën në rend dite, e bën atë pjesë kyçe të një manovre që shkon përtej shkeljes administrative – është një tentativë për tjetërsim të qëllimshëm të pronës publike. Edhe këtë herë ndoshta Dredha do të dalë nga mbledhja për t’ja lën “faturën” këshilltarëve.
Burime nga institucione ligjzbatuese bëjnë të ditur se i gjithë proçesi i votimit në këshillin bashkiak po monitorohet dhe në vazhdimësi mund të ketë dhe pranga për funksionarë të përfshirë në aferë.
Në një kohë që Vlora vuan problemet me ujin, me zjarret, menaxhimin e turizmit, pse kryetari Dredha shqetësohet kaq shumë që kjo pronë ti shkoj Mojsiut? Çfarë përfiton vallë?/ Prapaskena.com
Lexo edhe:
Moisi Lazaj zapton Ujin e Ftohtë në Vlorë dhe nis ndërtimin pa leje, policia dhe prokuroria heshtin
