Gazetari Enton Abilekaj foli në lidhje me zhvillimet e fundit në marrëdhëniet mes Edi Ramës dhe SHBA-së.
Ai theksoi se publikimi i një shkrimi kritik në Fox News nga një ish-ambasador amerikan ka tronditur qeverinë shqiptare, duke vënë në dukje se kjo është ndër ngjarjet më të rëndësishme të javëve të fundit për kryeministrin Edi Rama dhe mediat pranë tij.
Sipas Abilekajt, rikthimi i vëmendjes së administratës Trump ndaj Ballkanit, dhe veçanërisht Shqipërisë, mund të sinjalizojë një qasje më aktive dhe të vendosur të SHBA-ve në rajon.
“Qeveria është tronditur më shumë se çdo gjë me shkrimin që u botua në Fox News nga ambasadori. Vëmendja vjen nga mediat amerikane. Nëse në mediat amerikane nuk do të ketë hapësira për çfarë ndodh në Shqipëri, është vështirë që administrata ta kthejë kokën. Ngjarja më e rëndësishme, sidomos për Edi Ramën dhe mediat e tij ishte publikimi i Fox News.
Deklaratat e Trump për Ballkanin Perëndimor që do të rikthehet për të ribërë një marrëveshje dhe rifreskimi i dekretit presidencial për korrupsionin mendoj që paralajmërojnë një fushatë tjetër të Trumpit në Ballkan. Një fushatë e vendosur me vendimmarrje përfundimtare, jo me lënien e gjërave në diskutim dhe për diskutim. Do të ishte shumë e mirëpritur sikur Shtetet e Bashkuara të kthenin vërtet vëmendjen ashtu siç ka paralajmëruar presidenti. Kjo tregon që administrata Trump nuk e ka aq pas dore Shqipërinë sa mendojmë ne. Ky është një lajm shumë i mirë.” – tha Abilekaj per Syri tv.
