Një tërmet me magnitudë 4.2 të shkallës Rihter goditi Shqipërinë në orët e para të mëngjesit të sotëm. Epiqendra është regjistruar pranë zonës së Niklës, në një thellësi prej vetëm 5 kilometrash.
Sizmiologu Besian Rama i ftuar në MCN deklaroi se lëkundje të tilla janë të zakonshme për vendin tonë dhe ndihmojnë në çlirimin e energjisë sizmike, duke ulur rrezikun e tërmeteve më të mëdha në të ardhmen.
“Epiqendra ishte në veriperëndim të Kamzës, pranë fshatit Nikël. Fillimisht u raportua një magnitudë prej 4.5, por pas analizave më të detajuara për territorin tonë, rezultoi të ishte 4.2. Këto janë aktivitete të pranueshme për zonën. Tërmeti është paraprirë nga 3-4 lëkundje më të lehta, me magnituda 1.5 deri 1.9 gjatë natës. Po ashtu, janë regjistruar disa pasgoditje me intensitet më të ulët. Qendra e Monitorimit Sizmik ka qenë në gatishmëri të plotë dhe të gjitha sistemet kanë funksionuar siç duhet, duke e detektuar automatikisht ngjarjen.”
Sizmiologu Rama shtoi se tërmete të tilla janë pjesë e një zinxhiri aktivitetesh normale sizmike për zonën.
“Zona e Krujës ka disa linja thyerjeje, që prodhojnë herë pas here lëkundje të këtij lloji. Këto tërmete janë një kujtesë se duhet të mësojmë të bashkëjetojmë me to dhe të jemi të përgatitur. Është shumë më mirë që të ketë tërmete me magnituda të ulëta që çlirojnë energjinë, sesa të ndodhin papritur lëkundje të forta e të rrezikshme.”
Sizmiologu u bëri thirrje qytetarëve që të ruajnë qetësinë dhe të shmangin panikun.
“Në raste të tilla, është e rëndësishme të qëndrojmë në një vend të sigurt, të hapim dyert për të shmangur bllokimin dhe të vendosemi pranë objekteve të qëndrueshme. Paniku nuk ndihmon, ndaj duhet të jemi të përgatitur dhe të veprojmë me kujdes.”
