22 qershori ishte afati i fundit për prindërit që kërkonin të siguronin një vend në kopshtet dhe çerdhet publike të Tiranës për fëmijët e tyre. Një pjesë e mirë e tyre kanë mbetur pa regjistruar. Platforma zyrtare “e-femije.tirana.al” ka qenë jashtë funksionit prej ditësh, teksa denoncime të shumta janë bërë publike lidhur me këtë problematikë.
Pavarësisht denoncimeve, pavarësisht se afati i regjistrimit të fëmijëve në kopshte dhe çerdhe ka përfunduar dhe shumë fëmijë kanë mbetur pa regjistruar si pasojë e mosfunksionimit të platformës zyrtare, kryebashkiakja e komanduar e Tiranës Anuela Ristani dhe drejtoresha e përgjithshme e kopshteve dhe çerdheve në Tiranë Zhaneta Beqiri kanë zgjedhur të heshtin dhe jo të reagojnë lidhur me rastin.
Nuk ka asnjë njoftim zyrtar lidhur me problemin që haset nga prindërit dhe mosfunksionimin e platformës apo një shtyrje të afatit të regjistrimit. Kjo është një situatë absurde për një qytet që reklamohet si digjital, por që nuk garanton asnjë regjistrim bazik për fëmijët e vegjël. Prindërit kërkojnë ndërhyrje urgjente për të vendosur në funksion platformën në fjalë dhe për të garantuar një proces të drejtë dhe të barabartë për të gjithë fëmijët që u duhet të bëjnë regjistrimin për çerdhe dhe kopsht/ JOQ
