Kryeministri i Izraelit, Benjamin Netanyahu, ka lavdëruar Presidentin e SHBA-së, Donald Trump, pas sulmeve ajrore amerikane ndaj tre objekteve bërthamore në Iran. Netanyahu e quajti vendimin e Trump-it si “të guximshëm” dhe një moment historik për Lindjen e Mesme.
“Urime President Trump. Vendimi juaj i guximshëm për të goditur objektet bërthamore të Iranit me fuqinë e jashtëzakonshme dhe të drejtë të SHBA-së do ta ndryshojë historinë”, deklaroi Netanyahu në një reagim publik.
Sipas tij, këto sulme përbëjnë një hap vendimtar që mund të shënojë një kthesë drejt paqes në rajonin e tensionuar të Lindjes së Mesme.
Izraeli e ka bërë të qartë se mbetet i palëkundur në qëndrimin e tij për të mos lejuar Iranin të zhvillojë armë bërthamore. Netanyahu theksoi se këto veprime janë të domosdoshme për garantimin e sigurisë rajonale dhe ndërkombëtare.
