Presidenti i Shteteve të Bashkuara të Amerikës, Donald Trump, njofton se është zgjatur afati për mbylljen e platformës “TikTok” me 90 ditë.
Njoftimi bëhet nga vetë Trump në platformën “Truth Social”, teksa ndan dhe dokumentin e nënshkruar prej tij për zgjatjen e afatit të mbylljes deri më 17 shtator 2025.
“Sapo kam nënshkruar Urdhrin Ekzekutiv që zgjat afatin për mbylljen e TikTok për 90 ditë (17 shtator 2025). Faleminderit për vëmendjen tuaj ndaj kësaj çështjeje!”, shkruan ai në “Truth Social”.
Kjo është hera e dytë që Trump firmos urdhrin ekzekutiv për zgjatjen e funksionimit të “TikTok” në SHBA.
Vendimi vjen si një mundësi për t’i dhënë administratës së tij më shumë kohë për të ndërmjetësuar një marrëveshje.
Përfaqësuesit e ByteDance bënë të ditur se Kina nuk do ta miratonte më marrëveshjen për shitjen e TikTok derisa të ketë negociata për tregtinë dhe tarifat. Pekini njoftoi tarifa të gjera për çdo produkt amerikan në vlerën 34% dhe gjithashtu kontrolle mbi eksportet e metaleve.
Kongresi amerikan kishte mandatuar që platforma të hiqej nga Kina deri më 19 Janar ose të ndalohej në SHBA për arsye të sigurisë kombëtare, por Trump zgjati afatin pasi ai kërkoi të negocionte një marrëveshje për ta mbajtur atë në funksion.
Trump së fundmi ka pritur një sërë ofertash nga bizneset amerikane që kërkojnë të blejnë platformën sociale.
Bisedimet e udhëhequra nga Shtëpia e Bardhë për të ardhmen e TikTok, i cili përdoret nga rreth 1.7 milionë amerikanë, po bashkohen rreth një plani që investitorët më të mëdhenj jo-kinezë në kompaninë mëmë ByteDance të rrisin aksionet e tyre dhe të blejnë operacionet e aplikacionit në SHBA, raporton Reuters.
