Prokuroria e Tiranës ka kërkuar dënimin me 25 vite burgim për tre personat që kryenin trafikun e armëve nga Kosova në drejtim të Shqipëri.
Pretenca është lexuar në gjykatë nga prokurori që ka ndjekur hetimin e kësaj, dosje i cili në fund të gjykimit të çështjes, i kërkoi gjykatës deklarimin fajtor dhe dënimin me 15 vite burgim të Blerim Krasniqit, i cili akuzohet për “Trafikim të armëve” kryer në bashkëpunim.
Për shkak të gjykimit të shkurtuar, përfundimisht ndaj Blerim Krasniqit, prokurori kërkoi dënimin me 10 vite burgim.
Për Muhamed Krasniqin, përfaqësuesi i akuzës kërkoi dënimin e tij me 12 vite burgim. Por si pasojë e gjykimit të shkurtuar, përfundimisht prokuroria kërkoi 8 vite burgim.
Ndërsa për Edonis Thaçin, prokuroria kërkoi 7 vite burgim. Kjo dosje bën fjalë për një grup si Blerim Krasniqi, Benjamin Shala, Edonis Thaçi dhe Muhamed Krasniqi, që tashmë janë marë të pandehur dhe akuzohen për “Trafik armësh” të kryer në bashkëpunim.
Gjatë hetimeve të kryera prokurori i çështjes, Drini Pali, ka konstatuar se 4 personat e mësipërm kanë arritur në disa raste të ndryshme të fusnin nga Kosova në Shqipëri, disa pistoleta dhe më pas i tregtonin në Tiranë.
Grupi në fjalë i shiste armët e zjarrit nga 1500 deri ne 2000 euro përfshirë transportin me autobuzat që vinin në Shqipëri nga Kosova. Në momentin e arrestimit, atyre ju sekuestruar dhe 10 pistoleta “Ekol Special”.
Hetimi tregoi se bëhet fjalë për disa raste ku në shumicën e episodeve organizator ka qenë Valter Osmani, që ideonte trafikimin dhe tregtinë e armëve nga Kosova në drejtim të Shqipërisë.
Ky episod pasoi operacionin e kryer në muajin shkurt 2024, ku policia sekuestroi 203 kallëpë tritoli C4, duke shpallur në kërkim dy kosovarët Dritëro Azemi, Flaka Avdullahi dhe duke arrestuar Rigon Maliqin, Shkëlqim Halabaku dhe Lion Pira, të tre nga Gjilani i Kosovës.
Në të dyja rastet policia ka aktivizuar një agjent policor duke krijuar besim tek trafikantët për blerjen e municioneve dhe armëve, kundrejt një shumë prej 1.500 euro secila.
Ndërsa në rastin e tretë, sërish dy agjentë kanë blerë brenda radhëve të grupit të tregtisë së armëve, 6 pistoleta “Zoraki”, me një vlerë që varionte nga 900 euro deri në 1 mijë euro.
Sipas burimeve të Policisë, pistoletat janë blerë tek Valter Osmani, Euxhenjo Manushi dhe persona të tjerë.
/Ora News
