Gazetari Osman Stafa ka ngritur sërish zërin për situatën e rëndë të pacientëve të diagnostikuar me kancer në vendin tonë. Në një reagim të fundit në rrjete sociale, ai ka denoncuar mungesën e pajisjeve ekzaminuese dhe neglizhencën e sistemit shëndetësor, që sipas tij po i sorollat pacientët nga një spital në tjetrin, pa iu ofruar asnjë zgjidhje konkrete.
Stafa ka publikuar një foto të disa grave që presin për orë të tëra në dyert e Spitalit të Lezhës për të bërë skanerin. Ai thotë se fillimisht ato ishin në Tiranë, por pasi iu tha se aparatura nuk funksiononte, u orientuan drejt Lezhës. Edhe aty, sipas gazetarit, pacientet u përballën me të njëjtën situatë: mungesë sistemi dhe mungesë përgjegjësie.
“Ky është një krim që ndodh çdo ditë në heshtje. Pacientët me kancer sorollaten për një skaner që nuk ekziston. Ky sistem shëndetësor po tallet me jetën e njerëzve”, shkruan Stafa, duke e cilësuar situatën si skandaloze dhe të papranueshme.
Apeli i gazetarit vjen në një kohë kur shumë pacientë me sëmundje të rënda vuajnë jo vetëm nga diagnozat, por edhe nga shpërfillja e sistemit që duhet t’i mbështesë. Ai kërkon ndërhyrje të menjëhershme për të ndalur këtë cikël vuajtjeje dhe neglizhence.
View this post on Instagram
