Gjykata e Korçës, ka shpallur fajtor 21-vjeçarin, Dritson Kurti, pēr veprën penale “marrëdhënie seksuale me tē mitur”, por e ka vendosur në shërbim prove për njē periudhë 5 vjeçare, duke e liruar kështu edhe nga qelia.
Më konkretisht, togat e zeza kanë pranuar kërkesën e Prokurorisë, e cila në pretencën e saj kërkonte 7 vite burgim për Dritson Kurtin, ku nga gjykimi i shkurtuar dënimi i ulej në 4.8 vite burgim dhe sërish t’i konvertohej në 5 vite shërbim prove.
Dritson Kurti u arrestua në shtator të vitit të kaluar, pasi i riu u bë baba nga një 13-vjeçare, A Jonuzi, me të cilën bashkëjetonte. Rasti u zbulua pasi e mitura lindi një vajzë në Maternitetin e Korçës.
Ai rrezikonte deri në 25 vite burgim, por ky vendim lehtësues për të ka ardhur pas disa protestave të komunitetit rom para Gjykatës së Korçës, ku kërkonin shpalljen e tij të pafajshëm, duke pretenduar se ata e kanë traditë të martohen dhe të lindin fëmijë në moshë shumë të vogël.
Gjithsesi, edhe pas vendimit të sotëm, avokati i Kurtit, Enea Cenko, u shpreh se klienti i tij nuk është i kënaqur, pasi sipas tij duhej të shpallej i pafajshëm.
“Sot ishte një vendim për Dritson Kurtin. Gjykata e Korçës tashmë ka miratuar kërkesën e organit të akuzës që është shprehur për nenin 59 të Kodit Penal. E ka dënuar tashmë dhe gjykata e Korçës me një dënim prej 5 vitesh shërbim prove. Duhet theksuar që kjo gjë nuk na kënaq sepse unë vazhdoj të deklaroj që Dritson Kurti është i pafajshëm. Dua ta ritheksoj këtë fakt sepse nuk duhet të kënaqemi me nenin 59, për arsye sepse një pjesë e mirë e këtij komuniteti të nderuar në Shqipëri, që punojnë, e dashurojnë kulturën e njerëzit e mirë, duhet theksuar që këta si persona martohen që në djep sepse lidhen baballarët me njëri tjetrin dhe martojnë fëmijën që të vogël. Kjo është kultura e tyre, duhet ti respektojmë për këtë, gjithsesi ishte një moment i mirë procedurial që Dritsoni ti bashkohet familjes, të rrijë pranë vajzës së tij të mitur ku ende nuk e ka gëzuar. Duhet theksuar që është një rast që nuk është bërë me kallëzim nga bashkëjetuesja e tij, por është kallëzim i ngritur kryesisht. Edhe ne si mbrojtje kërkuam të aplikohej neni 59 i kodit të procedurës penale”, tha ai.
Më tej, avokati shton se çështjen do e çojë deri në Gjykatën e Strasburgut.
“Do të konsultohem edhe me Dritsonin, në rast që do e ndjekim këtë proces, unë do ta çoj deri në gjykatën e Strasburgut për të kërkuar pafajësinë e vërtetë sepse ai është i pafajshëm. 70-80% e këtij komuniteti janë në këto kushte”, u shpreh ai.
Sakaq, një thirrje pati nga ana e avokatit të Kurtit për institucionet vendase.
“Me këtë rast i bëj thirrje të gjithë institucioneve përkatëse, të ndërmarrin një iniciativë ligjore, komisionet parlamentare të ulen të diskutojnë, duke marrë parasysh dhe konventat europiane, të bashkëbisedojnë me ndërkombëtarët për të rishikuar kodin penal sepse nesër pasnesër mund të ketë të tilla situata sepse kjo është një kauzë”, tha ai.
