Një grua 45-vjeçare shqitare është vrarë me thikë në rrugë në qytetin italian të Tolentinos (në provincën Macerata) nga ish-bashkëshorti i saj, i cili e sulmoi teksa ajo ishte duke shkuar për në punë.
Pas krimit, burri thuhet se është ulur në një stol duke pritur policinë. Sipas raportimeve, viktima është shqiptarja Gentiana Hudhra, 45 vjeçe, nënë nënë e fëmijëve të rritur të moshës 21 dhe 23 vjeç. Në pranga u vendos ish-burri i saj, Nikollaq Hudhra, 55 vjeç.
Gruaja ishte duke kaluar nëpër parkun e rrugës Bennaduci për të shkuar në shtëpinë e së moshuarës që kujdesej, pasi punonte si kujdestare natën. Viktima ishte nënë e dy fëmijëve të rritur, për të cilët janë aktivizuar shërbimet sociale për mbështetje psikologjike.
Autoritetet janë ende duke rindërtuar ngjarjen. Sipas disa dëshmitarëve, ish-bashkëshorti e ka goditur edhe me shkelma, edhe pasi ajo kishte rënë pa shenja jete në tokë. Disa tregtarë të zonës thanë se pas krimit, ai u ul në një stol dhe u shpreh: “Bëra atë që duhej”.
Kundër autorit të krimit nuk kishte ndonjë denoncim të mëparshëm dhe historia personale e viktimës nuk ishte e njohur për forcat e rendit. Në vendin e ngjarjes mbërritën kryetari i bashkisë, Mauro Sclavi, si dhe karabinierët e Tolentinos dhe Maceratës. Ekipi i urgjencës 118 tentoi ta shpëtonte 45-vjeçaren dhe e transportoi në spital, por fatkeqësisht ajo kishte ndërruar jetë në vendngjarje.
