Nga Basir Çollaku
Nga dje qarkollun një lajm kudo nëpër medie, sikur Struktura e Posaçme ka bërë me dije se një ministër është në hetim. Në regjistrin e transparencës për muajin prill, gjendet edhe ky lajm. Natyrisht duke ditur tagrin ligjor të kësaj prokurorie, zotëria, me pak gjasa mund të jetë edhe zonjë, sepse përmendet posti jo gjinia, hetohet për korrupsion, apo fshehje pasurie, veprat të cilat mund të konsumojë një funksionar në zyrë publike. Sepse të ishte vrasje, do të kishim dëgjuar krismën. Të ishte trafik drogë, do kishte bërtitur organizata ku merr pjesë. Duket se kemi një përsëritje të rastit të Vis Doçit, ku në shkurt italianët e DIA dhe amerikanët e DEA, e në mars Struktura lypnin në Gjykatën e Posaçme arrestin, por me 20 maj shpërtheu haberi, dhjetë ditë pas zgjedhjeve.
Kush është ky ministër?
Përse prokurorët e përcjellin si njoftim dhomazh plazhi, dietë dobësimi, apo ulje çmimeve të trangujve e domateve, ngaqë u shtua prodhimi vendas. Gjithnjë duke ditur peshën e ngjarjes para dhe pas ditës së votimeve me 11 maj ?
Natyrisht hetimi ka kohë, muaj sigurisht në mos vite.
Po emri?
Pyetja është kë ka vënë në renditje hetimi, për ta njoftuar të paraqitret se punët kanë shkuar më thellë. Nuk është kohë as për konspiracion as dekonspirim. Emrat potencialë për të qenë në hetim prej më shumë se një vitit janë
Edi Rama
Duke shkrepur me inceneratorët, çështja McGonigal, çështja e Ols vëllait me “Xibrakën”, ku një hetim pasuror duhej të ishte mbaruar me kohë. Investimet strategjike ku mjaft trafikantë droge kanë marrë leje prej tij. Porti i Durrësit, marrja e 22 mijë metër katror tokë në Gjipe për “vëllanë” e vogël, e jo për vete, ku bukur fort më pas, kurdis një investim tjetër mbistrategjik ca milionë eurosh po aty. Ka mjaft të tjera, ku emri i tij shfaqet aq shpesh si në merkato futbollistësh.
Taulant Balla
Nga Toyota auris e transportit të miliona eurove të trafikut,akuzat e shumta për lidhjet me Suel Çelën, bandën e Elbasanit, përmendjet në dosjet e shumta të sky-enchro, dosja e skandalit Tims
Belinda Balluku
Tre zyzrtarë të kabinetit të saj nga drejtori rrugëve Berberi kanë përfunduar në gjykatë. Janë të tjera hetime, si rruga Thumanë-Kashar, tuneli Llogarasë, rruga e Arbërit, agregatët e energjisë në Vlorë, aeroporti i Vlorës, e shumë tendera flamujkuq nën bekimin e saj.
Damian Gjiknuri
Historia hetimore e nisur me Unazën e Re në Tiranë, e mjaft leje rrugësh e voltaikësh, janë aty për të verifikuar se sa vepër penale ka kalaur para se të nënshkruhet. Natyrisht guruja inidian është një novelë që duhet ndaluar për ta riparë, edhe të dy indianët e arratisur e në kërkim me 800 milionë euro që u shqiptarizuan dhe bënë investitorë të mëdhenj në Tiranë. Madje njëri u saju konsull shqiptar nëpër botë falë ndihmës për sevdanë indiane dhënë nga dy ministra. Nuk mungon inceneratori për të cilën struktura ka pohuar se janë bërë verifikime për disa nga veprimet e ministrit.
Pirro Vengu-Mirela Kumbaro
Ish drejtori i Portit të Durrësit, kur u bë katastrofa e mbetjeve toksike, një alarm botëror, shfaqet ministër mbrojtjeje, sikur duhet mbrojtur ministri. Te mbetjet edhe zonja Kumbaro ishte gjatë procedurës diku firmëtare. Eshtë porti ku kanë kaluar ngarkesa të shumta kokaine të kapura në portet e vendeve fqinje por në Durrës rehatia e mostrazimit sillej mirë me bandat.
Niko Peleshi
Ish-ministër mbrojtjeje, bujqësie dhe ish-zëvëndëskryeministër, vizitën e bëri në SPAK si i sh-kryebashkiak për një histori matësish uji. Ndonëse atje brenda ujërat trazohen në shumë vende. Nuk kanë munguar dyshimet për lidhjet me Zoto-Mërtiri e hetimet për favorizime janë një nga mundësitë.
Sigurisht Blendi Goxhe mund të mos jetë befasi hetimore, pasi denoncime nga detyra e mëparshme në parcelën e patentave nuk mungojnë. Pa u thelluar te jeta spanjolle.
Eshtë kollaj të listosh gjithë qeverinë dhe këdo ka qenë ministër i Ramës më herët në tre mandate, e të gjesh emrat e tyre nëpër dosjet e SPAK. Natyrisht pa hyrë te genocidi elektoral. Nëse bëjmë renditje medaljesh për të kapur skedinën pa emër të Strukturës së Posaçme, ajo rrotullohet afër treshes ministrore më të kuotuar hetimore, Taulant Balla, Belinda Balluku, Damian Gjiknuri
