I penduari i drejtësisë, Artan Tafani, gjatë seancës në GJKKO ka rrëfyer se pas vrasjes së Albi Bashaliut në vitin 2021, nisën të udhëtonin dhe të dilnin për dreka e për darka me Laert Haxhiun kudo në Shqipëri. Ai deklaroi se automjetet i mbanin në emrat e të dashurave.
Më pas shpjegoi se si e kryen një prej grabitjeve duke u hequr si policë, madje atij iu desh të mbante armën në dorë dhe të godiste fizikisht shoferin kur kundërshtoi, pasi e kuptoi që nuk ishin efektivë.
Artan Tafani: Makinat i mbanim në emrat e të dashurave. E fundit ishte nga Gjirokastra. Pas vrasjes së Bashaliut qëndorja gjithmonë nën shoqërinë e Laert Haxhiut. Shkonim në Sarandë, në Valbonë, dilnim nëpër restorante për dreka dhe për darka. Gjatë kësaj kohe Laert Haxhiu na thotë që duhet të grabisim një makinë, dolëm për të parë në Elbasan, Durrës, Tiranë dhe Rrogozhinë. Ku të shikonim makinë që na pëlqente, ndalonim dhe e merrnim, dy herë e kemi bërë.
Një makinë e morëm afër “Palma Novës”, një tip “Benz”, që na pëlqeu. I thamë “Ndal, policia!”: Ishte një çift që po rrinin mbrapa. Unë u prezontova si polic, i thashë keni parkuar keq dhe duhet të dilni nga makina. Ai çuni kujtoi se ishim policia, pastaj më vonë e kuptoi që ne do i merrnim makinën dhe na tha sa lekë doni, pasi e kuptoi që ne nuk ishim policia. Unë kisha pistoletën në dorë dhe e kapa nga krahu, i thashë dil jashtë. E godita një herë atë me dackë. Ata dolën, ne u futëm. E morëm makinën e parkuam në një parkim të hapur në Astir.
