Policia e Tiranës ka dalë me një komunikatë në lidhje me konfliktin masiv të regjistruar mbrëmjen e djeshme në zonën e “Ali Demit”, ku dyshohet se ka patur edhe të shtëna me armë zjarri.
Sipas autoriteteve policore, në sherr kanë marrë pjesë 5 persona, ku 4 prej tyre janë shpallur në kërkim, kurse një prej tyre ka mbetur i plagosur.
Më konkretisht, në kërkim janë shpallur shtetasit F. D., 36 vjeç, D. Zh., 25 vjeç, M. D., 27 vjeç dhe F. S., 27 vjeç. Ndërkohë, i plagosur ka mbetur shtetasi G. K., 26 vjeç, i cili ka marrë ndihmë mjekësore në spital dhe ndodhet jashtë rrezikut për jetën.
Gjithashtu, i plagosur është vënë edhe nën hetim, pasi në deklaratën e dhënë për grupin hetimor, ka gënjyer, duke dhënë të dhëna kontradiktore për ngjarjen. Burime për mediat bëjnë me dije se sherri ka ndoshur për shkak të një borxhi të pashlyer.
Uniformat blu kanë sekuestruar 1 shkop bejsbolli, 2 gëzhoja, 1 automjet dhe 3 celularë.
Njoftimi
“Specialistët për Hetimin e Krimeve të Komisariatit të Policisë Nr. 1 shpallën në kërkim shtetasit F. D., 36 vjeç, D. Zh., 25 vjeç, M. D., 27 vjeç dhe F. S., 27 vjeç, pasi mbrëmë, rreth orës 23:00, në rrugën “Ali Demi”, dyshohet se janë konfliktuar fizikisht dhe me sende të forta, me njëri-tjetrin. Si pasojë është dëmtuar shtetasi G. K., 26 vjeç (i dyshuar i përfshirë në konflikt), i cili mori ndihmën mjekësore dhe është jashtë rrezikut për jetën. Me 26-vjeçarin do të kryhen veprime procedurale në vijim, pasi ka deklaruar të dhëna kontradiktore për ngjarjen. Nga veprimet e para hetimore dyshohet se gjatë konfiktit është qëlluar me armë zjarri në ajër. Gjatë kryerjes së vendit të ngjarjes janë gjetur dhe sekuestruar 1 shkop bejsbolli, 2 gëzhoja, 1 automjet dhe 3 celularë. Vijon puna për kapjen e shtetasve në kërkim dhe për dokumentimin e plotë të rrethanave të ngjarjes.” – njofton Policia e Tiranës.
