Analisti Enton Abilekaj ka komentuar zhvillimet paszgjedhore dhe rolin e partive të vogla në atë që ai e cilësoi si ‘farsë zgjedhore’.
Sipas tij, përgjegjësia kryesore për këtë situatë bie mbi Kryeministrin Edi Rama, i cili, sipas Abilekajt, nuk ka organizuar asnjëherë zgjedhje të ndershme që nga marrja e pushtetit.
“Për mua duhet parë tek Edi Rama. Edi Rama nuk di të bëjë zgjedhje dhe nuk ka bërë ndonjëherë zgjedhje që kur ka qenë kryeministër.
Mundohet të krijojë një fasadë që na jep idenë se zgjedhjet po i plotësojnë të gjitha kushtet. Një nga pjesët e kësaj fasade është edhe rinumërimi që po bëhet tani në KQZ. Për mua është një përfitim i mazhorancës.
Ndërsa partitë e reja, pavarësisht kujt i shërbejnë, nuk kishin asnjë arsye që të pengonin opozitën dhe t’i merrnin vota opozitës. Ne ato i shohim sot si përçarëse të votave opozitare, sepse rezultatet që u krijuan nga këto palo zgjedhje, nëse do quhen të tilla, u krijuan siç u paralajmëruan në sondazhe.
Forcat e reja do të gërryenin opozitën dhe jo mazhorancën. Opozita humbi, sepse partitë e reja i morën votat, nuk e kemi ne fajin”- tha Abilekaj në ‘Task Force’ në SYRI TV.
