Gjykata e Korçës ka liruar nga burgu 4 zyrtarët e policisë kufitare në doganën e Kapshticës, të cilët u arrestuan mesditën e së shtunës pas një operacioni “sekret” nga Agjencia e Mbikëqyrjes Policore, ku u kap dhe mbi 6 kilogramës heroinë.
Togat e zeza e kanë kosideruar si të paligjshëm prangosjen e tre inspektorëve dhe nënkomisarit, ku në përfundim të seancës, e cila ka zgjatur për 4 orë e 20 minuta, vendosi lirimin e tyre dhe për pezullimin nga detyra.
Më konkretisht, bëhet fjalë për:
- N/komisar Ylli Dushku me detyre Pergjegjes Turni ne PKK Kapshtice
- Inspektor Franc Bylyku me detyre N/specialist kontrollor ne PKK Kapshtice
- Inspektor Lirim Hymetllari me detyre Trupe sherbimi ne PKK Kapshtice
- Inspektor Denion Myteberi me detyre Trupe sherbimi kontroll vija e dyte ne PKK Kapshtice
Kujtojmë se në kuadër të operacionit në fjalë u arrestua Valmir Balliu, nga fshati Vërdovë i Pogradecit pasi në automjetin që ai drejtonte u kapën 6 kg e 134 gr lëndë narkotike “heroinë”. Droga ishte fshehur në një vend të përshtatur enkas në automjetin që drejtohej nga i arrestuari, i cili tentoi ta kalonte lëndën narkotike drejt Greqisë.
Valmir Balliu dyshohet si anëtar i një grupi kriminal të trafikut të lëndëve narkotike, që vepron në zonën e Korçës dhe të Pogradecit, të cilët e kanë përdorur atë si korrier për transportimin e heroinës.
Trafikimi i lëndëve narkotike dyshohet se bëhej me “bekimin” e zyrtarëve të policisë së kufirit, pasi operacioni është kryer nga agjentët e Agjencisë së Mbikëqyrjes Policore, e cila e ka mbajtur “sekret”. Automjeti ka kaluar pikën kufitare pa iu ushtruar kontroll.
“Në vijim të hetimeve dhe informacioneve të siguruara në rrugë operative u arrit të dokumentohej me prova shpërdorimi i detyrës nga ana e punonjësve të policisë, të cilët me mosveprime dhe në shkelje të ligjit nuk kanë ushtruar kontroll ndaj mjetit me drejtues shtetasin Valmir Balliu, ku ishte e fshehur një sasi e dyshuar lëndë narkotike “Heroinë”. Në cilësinë e provës materiale janë sekuestruar 6 kg e 134 gr lëndë narkotike e dyshuar “Heroinë”, 5 aparate celularë, 256 fishekë (pistoletë model TT), 20 fishekë armë gjahu model 12 dhe një automjet.” – njoftoi AMP.
Ndaj Valmir Balliut rëndon akuza për veprën penale të “Trafikimit të narkotikëve” mbetur në tentativë. Hetimet për këtë rast po kryen nga Prokuroria e Korçës, për zbulimin e personave të tjerë që kanë bashkëpunuar me Valmir Balliun, me qëllim realizimin e trafikut të heroinës nga Shqipëria në drejtim të Greqisë.
Ashtu siç e konfirmoi edhe AMP, Valmir Balliut, por edhe zyrtarëve të kufirit u janë sekuestruar aparatet celulare, me shpresën se pas zbërthimit të tyre, do të gjenden komunikimet e anëtarëve të grupit kriminal të trafikut të drogës.
