Dhjetëra mijëra protestues spanjoll u mblodhën në qendër të Madridit për të kërkuar zgjedhje të parakohshme dhe për të shprehur pakënaqësinë ndaj qeverisë socialiste të kryeministrit Pedro Sánchez, e cila po përballet me një valë akuzash për korrupsion.
Në protestën e thirrur nga Partia Popullore (PP) me sloganin “Mafia apo demokraci” morë pjesë rreth 50 mijë protestues, sipas autoriteteve. Ndërkohë organizatorët flasin për rreth 100 mijë persona në shesh.
Demonstruesit mbanin pankarta me mesazhe si “Sánchez tradhtar” dhe “Qeveria të dorëhiqet”.
Qeveria dhe rrethi i ngushtë i kryeministrit spanjoll janë përballur gjatë vitit të fundit me akuza të shumta korrupsioni.
Presioni ndaj Partisë Socialiste (PSOE) është rritur edhe më shumë pas zbulimeve për një fushatë shpifjeje ndaj një njësie policore që po heton anëtarët e familjes së kryeministrit Sanchez, më konkretisht bashkëshorten, Begoña Gómez, të vëllain, David Sánchez dhe figura të tjera të larta politike si ish-ministri i Transporteve, José Luis Ábalos.
Leire Díaz, ish-anëtare e PSOE-së, e cila dha dorëheqjen pas publikimit të përgjimeve, mohon se ka vepruar për llogari të kryeministrit apo partisë, duke thënë se ishte duke bërë një hulumtim për një libër mbi korrupsionin.
Kryetari i Partisë Popullore, Alberto Núñez Feijóo, kërkoi sërish zgjedhje të parakohshme, duke theksuar nevojën për një “revolucion të ndershmërisë dhe lirisë”.
Nga ana e tij, kryeministri Sánchez akuzoi opozitën dhe mediat për “fushatë ngacmimi dhe sulmesh” ndaj tij dhe familjes, duke i cilësuar akuzat ndaj bashkëshortes së tij si të fabrikuara me qëllim rrëzimin e tij politik.
Begoña Gómez, gruaja e kryeministrit, është nën hetim për korrupsion dhe ndikim të paligjshëm në marrjen e sponsorizimeve për një program universiteti, një çështje e ngritur nga grupi me lidhje të djathta ekstreme, Manos Limpias.
Edhe vëllai i kryeministrit, David Sánchez, përballet me akuza për ndikim të paligjshëm, të cilat ai i mohon.
Nga ana tjetër, Partia Popullore, e cila ishte në qeveri deri para shtatë vitesh, është gjithashtu në shënjestër për mënyrën se si trajtoi përmbytjet në Valencia dhe menaxhimin e krizës së pandemisë në rajonin e Madridit.
Presidentja e rajonit të Madridit, Isabel Díaz Ayuso, po përballet me kritika për protokollet ndaj Covid-19 dhe hetime ndaj partnerit të saj. Ky i fundit akuzohet për mashtrim fiskal dhe falsifikim dokumentesh lidhur me disa kontrata për importin e maskave gjatë pandemisë.
Qeveria spanjolle u përpoq të minimizojë protestën, duke e cilësuar si shenjë dëshpërimi të Partisë Popullore. Ministrat publikuan foto dhe mesazhe për të treguar se pjesëmarrja në të ishte e ulët.
“Janë vërtet të nervozuar sepse kanë mbushur Sheshin e Spanjës me fyerje, por jo me njerëz… Teksa ata hedhin baltë, ne ecim përpara”, tha ministri i Transformimit Digjital, Óscar López.
