Një ngjarje shqetësuese ka ndodhur në stadiumin kombëtar “Air Albania” gjatë ndeshjes së shumëpritur Shqipëri–Serbi, ku Policia siç duket e porositur nga Federata Shqiptare e Futbollit ka ndërhyrë për të ndaluar shfaqjen e flamurit të Ushtrisë Çlirimtare të Kosovës (UÇK) dhe ka larguar nga stadiumi edhe një tifoz që mbante veshur një fanellë me këtë simbol.
Ky veprim ka ngjallur reagime të forta në rrjete sociale dhe në opinionin publik, veçanërisht në Kosovë, ku flamuri i UÇK-së vlerësohet si simbol i lirisë, qëndresës dhe sakrificës për çlirim.
Ngjarja ndodhi në një nga ndeshjet më të ngarkuara emocionalisht për shqiptarët, ku Shqipëria ishte nikoqire e Serbisë, në një përballje që tejkalon fushën e sportit dhe prek dimensione historike, politike dhe kombëtare.
Shfaqja e flamurit të UÇK-së nga tifozët nuk ishte e rastësishme, ishte një shprehje krenarie dhe kujtese kolektive për sakrificën e luftës për liri.
Megjithatë, para fillimit të ndeshjes efektivët ndërhynë për të larguar flamurin.
Më vonë u rregjistrua një moment edhe më i rëndë, ku mbi 20 policë e rrethuan një tifozë që po mbante veshur një fanellë me stemën e UÇK-së. Pavarësisht se tifozët tjerë u munduan ta mbronin tifozin, ai u largua nga stadiumi.
Sipas Kodit Penal dhe ligjeve shqiptare, nuk ka ndalim ligjor për simbolet e UÇK-së por siç duket kreu u FSHF-së Armando Duka është kujdesur t’i zbatojë me rigorizitet porositë e kundërshtarit për tu ndjerë sa më të qetë në vendin tonë.
