Gjashtë palestinezë janë vrarë dhe disa të tjerë janë plagosur nga të shtënat me armë në incidentin e fundit vdekjeprurës pranë një qendre shpërndarjeje ndihmash në Gazën jugore.
Njerëzit ishin mbledhur për të marrë furnizime ushqimore kur filluan të shtënat. Raportet që citojnë një dëshmitar okular thanë se izraelitët hapën zjarr kur njerëzit u përpoqën të përparonin drejt vendit. Ushtria izraelite tha se qëlloi me armë zjarri ndaj të dyshuarve që iu afruan në mënyrë kërcënuese.
Fondacioni Humanitar i Gazës ka bërë të ditur se do të rihapë dy nga pikat e tij të ndihmës, pasi të shtunën nuk shpërndau ushqimin e nevojshëm në Gaza. Një zyrtar i Hamasit ka bërë të ditur se operacionet e Fondacionit Humanitar të Gazës kanë “dështuar plotësisht në të gjitha nivelet” dhe se Hamasi ishte gati të ndihmonte në sigurimin e shpërndarjes së ndihmave përmes një operacioni të veçantë humanitar afatgjatë të udhëhequr nga OKB-ja.
Izraeli dhe Shtetet e Bashkuara të Amerikës e kanë akuzuar Hamasin për vjedhjen e ndihmës nga operacionet e udhëhequra nga OKB-ja, gjë të cilën militantët e mohojnë.
Sidoqoftë, incidenti i ri do të forcojë kritikat ndërkombëtare ndaj modelit të ri të shpërndarjes së ndihmave. Kombet e Bashkuara këmbëngulin se i vë palestinezët në rrezik dhe nuk ofron ushqim dhe ilaçe të mjaftueshme për t’u përballur me krizën humanitare në Gaza. Më shumë se 100 persona janë vrarë në vendet e shpërndarjes së ndihmave që kur ato filluan operacionet më 27 maj.
