Presidenti i SHBA-së, Donald Trump, nënshkroi urdhra ekzekutivë për të forcuar mbrojtjen ajrore kundër avionëve kërcënues pa pilot, si dhe për të promovuar taksitë ajrore elektrike dhe avionët komercialë supersonikë.
Sipas njoftimit të Shtëpisë së Bardhë, Trump nënshkroi tre urdhra të tillë.
Njëri prej tyre synon të lejojë përdorimin e dronëve përtej dukshmërisë së operatorëve të tyre – një kërkesë kyçe për dërgesat komerciale duke përdorur avionë pa pilot – dhe të zvogëlojë varësinë e SHBA-së nga kompanitë kineze që prodhojnë avionë të tillë. Gjithashtu do të fillojë testimi i avionëve elektrikë me ngritje dhe ulje vertikale (eVTOL).
Trump po krijon një task forcë federale që do të sigurojë kontrollin e hapësirës ajrore, do të zgjerojë kufizimet në zonat “të ndjeshme” dhe do të përdorë teknologjinë për të gjurmuar dronët në kohë reale, duke ndihmuar gjithashtu zbatimin e ligjit shtetëror dhe lokal.
Qëllimi i administratës është të adresojë “kërcënimin në rritje të kriminelëve terroristë dhe keqpërdorimin e dronëve të huaj në hapësirën ajrore të SHBA-së”, tha Michael Kratsios, drejtori i Zyrës së Politikës së Shkencës dhe Teknologjisë në Shtëpinë e Bardhë. “Ne po sigurojmë kufijtë tanë nga kërcënimet e sigurisë kombëtare, përfshirë ato në ajër, në përgatitje për ngjarje të mëdha publike si Lojërat Olimpike dhe Kupa e Botës“, shtoi ai.
Sebastian Gorka, drejtor i antiterrorizmit në Këshillin e Sigurisë Kombëtare, përmendi përdorimin e dronëve në luftën e Ukrainës dhe kërcënimet në ngjarjet e mëdha sportive në SHBA. “Ne do të forcojmë aftësitë tona për t’u përballur me dronët”, si dhe “ligjet në fuqi për të penguar dy lloje njerëzish: kriminelët dhe budallenjtë“, tha ai.
Trump gjithashtu udhëzoi Administratën Federale të Aviacionit të hiqte një ndalim të vitit 1973 për fluturimet supersonike mbi tokë.
