Autori i masakrës së Capaci-t ku u vra kryeprokurori i Antimafias italiane Giovanni Falcone, ka fituar lirinë e plotë.
Giovanni Brusca, i njohur si krahu i djathtë i ish-bosit të “Cosa Nostra”-s, Toto Rina, pas 25 vitesh burg, u lirua me kusht për 4 vite në vitin 2021, ndërsa më 1 qershor 2025, ai ka fituar lirinë e plotë.
Brusca u bë bashkëpunëtor i drejtësisë, duke pranuar shumë prej vrasjeve, ku më e bujshme ishte pjesëmarrja e tij në masakrën e Capaci-t.
Ai ishte personi që kreu shpërthimin e telekomanduar të bombës në distancë më 23 maj 1992, ku si pasojë humbën jetën kryeprokurori Giovanni Falcone, gruaja e tij Francesca Morvillo dhe tre nga agjentët e tij të eskortës.
Lirimi i Bruscas ka shkaktuar indinjatë të thellë tek të afërmit e viktimave. Tina Montinaro, e veja e Antonio Montinaros, truproja i gjyqtarit Falcone, nuk e fshehu hidhërimin e saj.
“Është e dhimbshme të dish që një njeri përgjegjës për kaq shumë vdekje është i lirë sot. E kuptoj që ligji është zbatuar, por për ne është sikur të mos ketë ndodhur asgjë. Bashkëpunimi me drejtësinë nuk i fshin krimet e kryera”, thotë ajo.
Brusca, i dënuar për qindra vrasje, përfshirë atë të vogëlushit Joseph DiMatteo trupi i të cilit u shkri me acid, do të jetojë larg Siçilisë me një identitet të rremë dhe do të mbetet nën programin e mbrojtjes.
Kush është Brusca
Giovanni Brusca më 23 maj 1992, ishte në krye të aksionit të vënies së bombës në autostradën siçiliane në afërsi të qytezës së Capacit, u vra Prokurori i Antimafias, Giovanni Falcone, bashkëshortja e tij Francesca Morvillo dhe tre truproje të tij.
Falcone-vrasja-Brusca-italia-masakra-Carpacit (2)
Po ashtu vetë Giovanni Brusca ka pranuar autorësinë e vrasjes së 11- vjeçarit, Giuseppe Di Matteo, djali i Santino Di Matteo, ish-mafiozi që vendosi të bashkëpunojë me drejtësinë. Djali i ish-mafiozit të penduar u mbyt me litar dhe trupi i tij u shkri në acid.
Giovanni Brusca u arrestua më 20 maj të vitit 1996 dhe vendosi të bashkëpunojë me drejtësinë italiane, duke rrëfyer krimet e mafies siçiliane në Romë dhe Firenze pas viteve ’90.
Rrëfimet e tij shërbyen në ekzekutimin e mjaft operacioneve të Antimafias, si dhe për hetimet e mega-procesit në Itali, i quajtur, shteti kundër mafies. Dëshmitë e Bruscës, sollën lehtësimin e dënimit, duke përfituar dhe nga një klauzolë speciale, si i konsideruar “bashkëpunëtor i besueshëm i drejtësisë”.
