Gjykata e Lartë ka lënë në fuqi vendimin për dënimin me 14 vite burg për Arbër Çekajn, i cili ka përfituar nga ulja e 1/3 së dënimit për shkak të gjykimit të shkurtuar.
Arbër Çekaj është shpallur fajtor për trafikimin e një sasie prej 613 kg kokainë që u sekuestrua në vitin 2018 në Portin e Durrësit. Lënda narkotike u gjet në një kontejner me banane që vinte nga Amerika Latine dhe ishte e destinuar për kompaninë “Arbi Garden”, në pronësi të Arbër Çekajt.
Po ashtu, Gjykata e Lartë ka vulosur dënimet edhe për dy bashkëpunëtorët e Çekaj, shtetasin Donaldo Lushaj i cili është dënuar me 10 vjet e 8 muaj burg dhe Armando Pezaku i cili do të vuajë 8 vite e 8 muaj burg.
Droga u kap më 28 shkurt 2018 në Portin e Durrësit dhe përbën sasinë më të madhe të kokainës e sekuestruar ndonjëherë në vend. Sasia ishte ndarë në 528 pako të ndryshme, secila me shenja dalluese.
Nga hetimet e Prokurorisë ka rezultuar se Arbër Çekaj rezulton të jetë organizatori i gjithë operacionit të trafikimit të drogës, përfshirë porositjen, nisjen, transportimin dhe mbërritjen e lëndës narkotike në Shqipëri.
Kujtojmë se më vonë u arrestua edhe babai i Arbër Çekajt, shtetasi Selim Çekaj, pasi në një kontejner me banane të porositur prej kompanisë së administruar prej tij, u gjetën 49 kg kokainë, por më pas ai u lirua.
Arbër Çekaj është dënuar me 1 vit burgim edhe për tentativën e arratisjes me Fatmir Pjetrin, ku më 8 gusht 2021 ata dolën nga zgara e zonës së ajrimit e më pas duke përdorur një litar të prodhuar me çarçafë zbritën në hapësirën para portës së burgut, por nuk munden të dilnin nga rrethimi.
