Sekretarja e shtypit e Shtëpisë së Bardhë, Karoline Leavitt, foli për luftën në Ukrainë në konferencën e saj të fundit për shtyp.
Ajo u pyet pse presidenti amerikan, Donald Trump ka heshtur për sulmet me dronë të Ukrainës gjatë fundjavës ndaj bombarduesve rusë me rreze të gjatë veprimi dhe nëse sulmet tregojnë se Volodymyr Zelensky “kishte disa karta” në luftë në fund të fundit. Ky formulim i referohet përballjes në Zyrën Ovale kur presidenti amerikan i tha udhëheqësit ukrainas se ai “nuk ka asnjë kartë”.
Duke shmangur pjesën e parë të pyetjes, Leavitt tha se Trump “mbetet pozitiv për progresin që është bërë” në katër muajt që kur ai erdhi në detyrë, i cili kulmoi dje me takimin e drejtpërdrejtë të Ukrainës dhe Rusisë në Stamboll.
“Trump është gjithashtu realist dhe e kupton se këto janë dy vende që janë në luftë. Ai po punon shumë për të zgjidhur këtë konflikt.”, u shpreh ajo.
E pyetur nëse Trump e miratoi vendimin e Ukrainës për të goditur bombarduesit me kapacitet bërthamor, ajo u përgjigj duke thënë se “Do të doja që presidenti të fliste vetë për këtë.”
Sakaq theksoi se Trump nuk ishte i informuar paraprakisht për sulmet.
Gjatë fundjavës, Ukraina nisi një sulm të paprecedentë ndaj bombarduesve me rreze të gjatë veprimi të Rusisë.
Zyrtarët e Kievit thanë se sulmi i së dielës dëmtoi ose shkatërroi më shumë se 40 avionë luftarakë në bazat ajrore thellë brenda Rusisë, duke përfshirë rajonet e largëta të Arktikut, Siberisë dhe Lindjes së Largët, më shumë se 4,300 milje larg Ukrainës.
