Komisioni Qendror i Zgjedhjeve (KQZ) i është përgjigjur zyrtarisht Partisë Demokratike – Aleanca për Shqipërinë Madhështore, duke rrëzuar pretendimin për fenomenin e “trenit bullgar” në Peqin.
Në përgjigjen drejtuar përfaqësuesit ligjor të PD-ASHM, Franc Nuri, Komisioneri Shtetëror i Zgjedhjeve, Ilirjan Celibashi, bën me dije se: “Gjatë procesit të marrjes në dorëzim të bazës materiale të dërguar nga KZAZ nr. 45, Peqin, nuk është evidentuar ndonjë rast ku fletë votimi të papërdorura të jenë administruar jashtë kutive të materialeve zgjedhore të kësaj KZAZ-je.”
Kjo përgjigje vjen pas një kërkese të depozituar më 22 maj 2025 nga PD-ASHM, e cila kishte kërkuar informacione lidhur me ekspertizën mbi materialet zgjedhore të kapura në Peqin, Qarku Elbasan.
