Janë zbardhur detaje të reja nga operacioni “Puzzle”, ku Policia e Tiranës në bashkëpunim me Prokurorinë, goditën një grup prej 12 anëtarësh që merrej me trafikun e armëve të zjarrit Kosovë-Shqipëri, ku 10 prej tyre janë arrestuar, ndërsa dy janë shpallur në kërkim.
Burime për mediat bëjnë me dije se grupi kriminal i kalonte armët në kufi me makina të vogla dhe me numër të vogël. Baza e këtij grupi kriminal ishte në qytetin e Burrelit, ku dyshohet se kryheshin ruajtja dhe shpërndarja e armëve të zjarrit të sjella nga Kosova.
Po ashtu, grupi hetimor ka dokumentuar raste shitjeje të armëve edhe në Shkodër dhe në Kurbin, detaje të cilat tregojnë se kemi të bëjmë me një rrjet të mirëorganizuar në disa qytete të vendit.
Grupi kriminal trafikonte kryesisht pistoleta, përfshirë ato të llojit “Glock”, por edhe armë të tjera automatike. Çmimi i një pistolete në tregun e zi varionte nga 1500 deri në 2500 euro, në varësi të tipit dhe modifikimeve të bëra – disa prej të cilave ishin me silenciator.
Kujtojmë se në kuadër të operacionit “Puzzle” janë sekuestruar 14 armë zjarri (12 pistoleta, njëra prej tyre me silenciator, dhe 2 automatikë), 2077 fara cannabisi, krehra dhe municion luftarak, 3 automjete dhe 8 celularë.
Në pranga janë vënë shtetasit: Emirel Tusha, Leandro Haxhiaj, Fabricio Berberi, Rikardo Hajdaraj, Visar Murati, Kevin Farruku, Geraldo Muraj, Adriano Shehu, Altin Pajaziti dhe Kadri Prushi, ndërsa në kërkim janë shtetasit R. K. dhe A. N..
