Policia e Tiranë, pas një hetimi 5 mujor nën drejtimin e Prokurorisë, ka goditur një grup të trafikut të armëve të zjarrit nga Kosova në Shqipëri.
Raportohet se në kuadër të operacionit të koduar “Puzzle” janë identifikuar 12 persona pjesë të këtij grupi, ku 10 prej tyre janë arrestuar, ndërsa dy të tjerë janë shpallur në kërkim.
Më konkretisht, në pranga janë vënë shtetasit: Emirel Tusha, 32 vjeç, Leandro Haxhiaj, 21 vjeç, Fabricio Berberi, 26 vjeç, Rikardo Hajdaraj, 21 vjeç, Visar Murati, 23 vjeç, Kevin Farruku, 18 vjeç, Geraldo Muraj, 22 vjeç dhe Adriano Shehu, 23 vjeç.
Ndërkohë, më 1 Prill u arrestuan edhe shtetasit Altin Pajaziti, 23 vjeç dhe Kadri Prushi, 53 vjeç, të cilët u ndaluan ndërkohë që udhëtonin në autostradën “Lezhë – Fushë Krujë, ndërsa në automjet iu gjetën dyarmë zjarri pistoleta dhe municion luftarak.
Gjithashtu, në kuadër të këtij operacioni janë shpallur në kërkim dhe shtetasit R. K., 41 vjeç dhe A. N., 24 vjeç, ku thuhet se po punohet për kapjen e tyre.
“Nga hetimet dyshohet se këta shtetas, pasi siguronin armë zjarri kryesisht në Kosovë por dhe në qytete të ndryshme të Shqipërisë, i sillnin ato në Tiranë, për t’i shitur. Gjatë periudhës hetimore, në kuadër të këtij procedimi, më datë 01.04.2025, janë ndaluar shtetasit Altin Pajaziti dhe Kadri Prushi, pasi u kapën në flagrancë me 2 armë zjarri, të dyshuara të trafikuara nga Kosova, me qëllim shitjen në Tiranë. Në vijim të veprimeve, gjatë kontrollit të banesës së shtetasit K. F, shërbimet e Policisë gjetën e sekuestruan 2077 fara cannabisi.” – njofton Policia.
Gjithsej, në kuadër të operacionit “Puzzle” janë sekuestruar 14 armë zjarri (12 pistoleta, njëra prej tyre me silenciator, dhe 2 automatikë), 2077 fara cannabisi, krehra dhe municion luftarak, 3 automjete dhe 8 celularë.
Policia e Tiranës thotë se nën drejtimin e Prokurorisë, po bashkëpunojnë me autoritet policore kosovare për identifikimin dhe kapjen e personave të tjerë të përfshirë në këtë veprimtari kriminale. Materialet procedurale i kanë kaluar Prokurorisë së Tiranës për veprime të mëtejshme.
Burime për mediat bëjnë me dije se një prej bazave të këtij grupi kriminal ishte në qytetin e Burrelit, ku dyshohet se kryheshin ruajtja dhe shpërndarja e armëve të zjarrit të sjella nga Kosova.
Po ashtu, grupi hetimor ka dokumentuar raste shitjeje të armëve edhe në Shkodër dhe në Kurbin, detaje të cilat tregojnë se kemi të bëjmë me një rrjet të mirëorganizuar në disa qytete të vendit.
Grupi kriminal trafikonte kryesisht pistoleta, përfshirë ato të llojit “Glock”, por edhe armë të tjera automatike. Çmimi i një pistolete në tregun e zi varionte nga 1500 deri në 2500 euro, në varësi të tipit dhe modifikimeve të bëra – disa prej të cilave ishin me silenciator.
Policia ka publikuar edhe pamjet e operacionit “Puzzle”, momentet kur arrestohen anëtarët dhe gjetja e armëve të zjarrit.
