Këshilli i Emërimeve në Drejtësi (KED), ka pezulluar vakancën në Gjykatën Kushtetuese për zëvendësimin e magjistrates së dorëhequr Elsa Toska.
Ky vendim është marrë në mbledhjen e sotme, për shkak se numri i kandidatëve në garë, pas verifikimit kushteve ligjore, ka rënë nën tre. Gjithashtu është caktuar edhe njoftimi i Kuvendit të Shqipërisë, si organi që ka vënë në lëvizje procedurën, për të vlerësuar rishpalljen e thirrjes për paraqitjen e kandidaturave.
Elsa Toska dha dorëheqjen si anëtare e Gjykatës Kushtetuese në shtator të vitit të kaluar, e cila u pasua më pas nga vendimi i kryetares së Kuvendit, Elisa Spiropali, për shpalljen e vakancës për një mandat që përfundonte, jo në vitin 2025, për në vitin 2028.
Ky akt do të shënonte krisjen e parë në skemën e ripërtëritjes së Gjykatës Kushtetuese me tre anëtarë për gjatë këtij viti. Në këtë përplasje është përfshirë dhe presidenti Bajram Begaj, si dhe kreu i Gjykatës së Lartë, Sokol Sadushi.
NJOFTIMI I KED-së
Këshilli i Emërimeve në Drejtësi (KED), në përmbushje të detyrimeve kushtetuese dhe ligjore, zhvilloi të enjten mbledhjen e radhës, në të cilën shqyrtoi ecurinë deritanishme të procedurës së verifikimit të kushteve ligjore për kandidatët e paraqitur për vendin vakant në Gjykatën Kushtetuese, të shpallur nga Kuvendi i Shqipërisë më datë 30.09.2024.
Gjatë fazës së verifikimeve, u konstatua se numri i kandidatëve që plotësojnë kushtet ligjore ka rënë nën pragun minimal të parashikuar prej tre kandidaturash. Në respekt të dispozitave kushtetuese dhe ligjore, si dhe në zbatim të vendimit nr. 84/2024 të Gjykatës Kushtetuese që thekson rëndësinë e përtëritjes së rregullt të kësaj gjykate, një here në tre vjet, Këshilli vendosi si më poshtë:
- Pezullimin e procedurës së verifikimit të kandidaturave për pozicionin vakant në Gjykatën Kushtetuese të shpallur më 30.09.2024.
- Njoftimin e Kuvendit të Shqipërisë, si organi që ka vënë në lëvizje procedurën, për të vlerësuar rishpalljen e thirrjes për paraqitjen e kandidaturave.
Ky vendim bazohet në nenin 125 të Kushtetutës, nenin 7/c të ligjit nr. 8577/2000, nenin 218 të ligjit nr. 115/2016, si dhe në aktet nënligjore përkatëse që rregullojnë këtë proces. Vendimi do të publikohet në faqen zyrtare të Gjykatës së Lartë, në seksionin e dedikuar për Këshillin e Emërimeve në Drejtësi.
VENDIMI
