Autoritetet policore kanë raportuar për 5 aksidente automobilistike ditën e sotme në Tiranë, fatmirësisht, asnjëri prej tyre me viktima.
Më konkretisht:
- Shtetasin H. Z., 58 vjeç, me automjetin që drejtonte, ka përplasur në rrugën “Sami Frashëri” këmbësorin, shtetasin M. Sh., 54 vjeç. Ky i fundit ka mbetur i plagosur dhe është dërguar në spital, ku ndodhet në kujdesin e mjekëve. Ndërkohë, shoferi është proceduar penalisht në gjendje të lirë.
- Në Rrugën e Arbërit, automjeti me drejtues shtetasin E. M., 39 vjeç është përplasur me motorin me drejtues shtetasin E. D., 33 vjeç. Ky i fundit ka mbetur i plagosur dhe aktualisht është në kujdesin e mjekëve. Të dy drejtuesit janë proceduar penalisht në gjendje të lirë.
- Në autostradën “Tiranë-Durrës”, automjeti që drejtonte shtetasi L. T., 60 vjeç është përplasur me një automjet tjetër në lëvizje. Si pasojë e aksidentit ka patur vetëm dëme materiale, ndërsa 60-vjeçari është proceduar penalisht në gjendje të lirë.
- Në një vendparkim automjetesh, makina që drejtonte shtetasi Y. L., 64 vjeç është përplasur me një objekt (depozitë hekuri). 64-vjeçari pasi ka marrë ndihmë mjekësore në spital, është larguar për në banesë, jashtë rrezikut për jetën. Gjithashtu, ai është proceduar penalisht në gjendje të lirë.
- Shtetasi A. K., 29 vjeç dyshohet se ka humbur kontrollin mbi automjetin që drejtonte dhe si pasojë makina është përplasur me murin kufizues të autostradës së Unazës së Re. I riu ka mbetur i plagosur dhe është dërguar në spital, ku ndodhet në kujdesin e mjekëve. Gjithashtu, edhe ai është proceduar penalisht në gjendje të lirë.
Për 5 rastet në fjalë materialet janë referuar në Prokurorinë e Tiranës për vperime të mëtejshme.
