Mentor Kusho, me profesion mësues, është rasti tipik se si shteti, biznesi dhe të gjithë strukturat sillen me qytetarët.
Me kursimet e jetës, ai nënshkroi një kontratë noteriale për blerjen e një apartamenti në Fier, me kompaninë “A&E kontruksion” në pronësi të Eqerem Mehmetaj dhe Agron Seitaj. Pas 16 vitesh, ai nuk e zotëron atë pronë. Madje, është futur në një spirale procesesh gjyqësore, padi, kundërpadi, pa gjetur të drejtën.
“Bëra një shënim në derë që është e shitur dhe gjatë kësaj kohe nuk u arrit të shitej edhe pse u tentua për t’u shitur nga pronarët e firmës. Mirëpo, duke parë numrin e telefonit, blerësi komunikohet dhe janë të hequr disa blerës”, u shpreh Mentor Kusho, denoncues.
Pas kallëzimit të Mentorit, gjykata dënoi me 8 vite burg për mashtrim ndërtuesin Mehmetaj. Ortaku tjetër, Seitaj, u dënua me 12 vite burg.
Këtu fillon një tjetër kalvar. Duke qenë se as pronarët e truallit nuk kishin marrë apartamentet e premtuara, atëherë gjykata ua kthen truallin së bashku me objektin 9-katësh që kishte përfunduar së ndërtuari. Ata aplikojnë për legalizim.
“Me këtë pallat, pronari i tokës së bashku me një tjetër që ishte gjysmë aksioner tek firma, kish paguar, kish bërë punime rreth 200-300 milionë lekë të vjetra, punimet së bashku me këtë i kalojnë dhe hedhin për legalizim sikur ky pallat është bërë nga këta, jo sikur të jetë bërë nga firma”, u shpreh denoncuesi.
Mentori e konsideron absurd faktin që gjykata i njohu si pronarë të objektit pronarët e truallit. Këta të fundit u kërkuan sërish banorëve që t’ua rishisnin. Ata që nuk pranuan nuk i përfshinë në procesin e legalizimit, por bënë kontrata të reja me një noter në Lushnje.
“Më duket prapë absurde kjo; një objekt i shqyrtuar në Fier të bëjë aktin noterial në Lushnjë. Janë futur vetëm ata që ju ka bërë ky pronari i tokës shitjen te noteri i Lushnjës”, u shpreh Mentor Kusho.
Mes denoncimeve dhe gjyqeve të shumta për mashtrime, gjykata i thotë mentorit se duhet të merret me firmën që i ka marrë lekët dhe jo me këta që e kanë tani objektin.
“Dhe në këtë vendim, gjykata vendosi se përderisa s’është përfunduar si objekt, marrëdhënia e ke me firmën, jo me pronarin e truallit, kështu që ti nuk mund të kërkosh që objekti, edhe pse unë kisha një dokument që e kisha blerë unë atë si objekt, kisha blerë truallin, kisha blerë objektin…”, u shpreh Mentor Kusho, denoncues.
Ky është kalvari i një mësuesi që shpenzoi kursimet e jetës për një strehë, por endet në gjykata prej vitesh.
“U lodha aq shumë me gjyqe në gjykata, jam larguar nga Fieri dhe nuk e kam ndjekur më si procedurë as apelin, as vendimin e apelit. Apelova vendimin e gjykatës për mos përfshirje të emrit tim në legalizim, sepse përderisa pallati kaloi në legalizim, unë këtë kërkova, që të njihet objekti dhe në fund legalizimi përfundoi vetë objekti”, u shpreh Mentor Kusho, denoncues./ Inside Story
