Një nga rastet më tronditëse të abuzimit seksual në historinë e Francës ka marrë fund sot me shpalljen e vendimit për Joel Le Scouarnec, ish-kirurg 74-vjeçar, i cili u dënua me 20 vite burg për 299 raste të abuzimeve seksuale të kryera gjatë tre dekadave të fundit.
Shumica e viktimave ishin fëmijë të moshës mesatare 11 vjeç, djem dhe vajza, të cilët shpeshherë ishin nën efektin e anestezisë apo në fazën e rikuperimit pas operacioneve.
Dënimi u shpall në qytetin Vannes të rajonit të Bretanjës, ku për tre muaj me radhë u zhvillua gjyqi.
Le Scouarnec e pranoi fajësinë në sallën e gjyqit, duke deklaruar: “Isha një kirurg që abuzoi me prestigjin e tij për të sulmuar fëmijë, nuk e mohoj këtë”. Ai gjithashtu shtoi se nuk kërkon mëshirë nga gjykata. Psikiatrit e cilësuan si “jashtëzakonisht të rrezikshëm”.
Dënimi i sotëm do të ekzekutohet paralelisht me një tjetër dënim prej 15 vitesh, të marrë në vitin 2020 për katër raste të përdhunimit të të miturve.
Gjykata theksoi se Le Scouarnec nuk mund të kërkojë rishqyrtim të dënimit para se të përfundojë dy të tretat e tij, për të shmangur rrezikun e përsëritjes së veprës.
Në deklaratën e tij të fundit para gjykatës, ai tha: “Nuk kërkoj mëshirë. Vetëm më lejoni të përpiqem të bëhem njeri më i mirë”.
Prokuroria kërkoi, në një veprim të rrallë, që ai të mbahet nën mbikëqyrje në një qendër trajtimi edhe pas përfundimit të dënimit, për shkak të rrezikshmërisë së lartë. Nuk është ende e qartë nëse gjykata ka pranuar këtë kërkesë.
Gjatë gjyqit dëshmuan qindra dëshmitarë, përfshirë mbesën e Le Scouarnec dhe një mik familjar, të cilat deklaruan se ishin abuzuar në fillim të viteve 1980. Megjithatë, për shkak të kufizimeve ligjore në Francë, ai nuk mund të ndiqej penalisht për këto raste, pasi ndodhën shumë vite më parë.
Shumë nga viktimat nuk e kujtonin abuzimin, por policia arriti të mbledhë prova të pakundërshtueshme pasi Le Scouarnec kishte mbajtur ditarë digjitalë me përshkrime të detajuara të akteve të tij.
Ky rast ka rikthyer vëmendjen mbi sistemin shëndetësor francez, i cili lejoi Le Scouarnec të vazhdonte të punonte si kirurg, edhe pas një dënimi të mëparshëm në vitin 2005 për posedim të imazheve të abuzimit të fëmijëve.
Pas këtij dënimi, ai nuk u përjashtua nga profesioni. Përkundrazi, punoi në nëntë spitale publike dhe klinika private në pesë rajone të Francës, ku kryente operacione të ndryshme, përfshirë apendektomi dhe ndërhyrje gjinekologjike.
Avokatët e viktimave kërkojnë një reformë të thellë të mënyrës se si trajtohen akuzat për abuzim ndaj fëmijëve, sidomos kur autorët janë profesionistë të shëndetit.
“Për më shumë se 30 vjet kishte sinjale të qarta. Ky njeri përfitoi nga një sistem që i hapi dyert për të vepruar i papenguar”, deklaroi Francesca Satta, avokate e 10 viktimave dhe familjarëve të tyre.
Për shkak të interesimit të madh, shumë viktima ndoqën procesin përmes videolidhjes nga një amfiteatër me 450 vende, i vendosur afër gjykatës që nuk kishte kapacitetin për të pritur të gjithë të interesuarit. Dy salla të tjera transmetimi, të vendosura në një ish-shkollë juridike, u përdorën për përfaqësuesit e mediave dhe publikun.
