Drejtuesi politik i PD-së për Tiranën, Belind Këlliçi i ftuar në ‘A Shoë’ me Adi Krastën, është shprehur se në 11 maj ka pasur një farsë elektorale dhe jo zgjedhje.
Gjatë bisedës në studio, Këlliçi deklaroi se PD-ja në 11 maj, është përballur me një parti shtet, pasi Partia Socialiste nuk ekziston më.
‘Ka një parti shtet që e gjithë administrata publike, 185 mijë punonjës, punojnë për ditën e zgjedhjeve, njëherë në dy vite’, theksoi Këlliçi gjatë bisedës në studio.
‘Po i faktojmë çdo shqiptarëve, farsën që ka ndodhur nga shteti elektoral që drejtohet nga Edi Rama, në 11 maj. Dua që të them që në fillim, pa shmangur përgjegjësitë tona, që duhen diskutuar. Çdo njeri në PD ka përgjegjësitë e veta.
Është një tren që nuk duhet humbur dhe është treni që e kemi nisur me qarkun e Kukësit. Nuk është mbledhur kryesia e PD-së, por kjo është një çështje e brendshme.
Kemi nisur ankimin zyrtar të të gjitha qarqeve, duke kërkuar një pavlefshmëri totale të zgjedhjeve, sepse nuk ka patur zgjedhje. Vij nga një takim me njësinë numër 5, me strukturat e PD, ndër më të nxehtët dhe më emocionalet që mund te kemi pasur në 12 vite opozitë.
Të gjithë për herë të parë janë të qartë çfarë ka ndodhur. Ka qenë farsë elektorale, nuk ka pasur zgjedhje. Shteti elektoral i Edi Ramës është i gjithi, nuk ka më PS, por ka një parti shtet që e gjithë administrata publike, 185 mijë punonjës, punojnë për ditën e zgjedhjeve, njëherë në dy vite.
Ne sot jemi në garë me shtetin.
Nuk po ankohemi, por kemi detyrë që të tregojmë dhe të faktojmë se çfarë ka ndodhur në 11 maj, duke filluar nga bandat, tek treni Bullgar dhe tek votat e Greqisë, që nuk besoj se ka shqiptar që mendon se ka shqiptar në botë që votojnë 98%, PS-në dhe 2% të gjitha partitë e opozitës.
